Ishavskraft juolluda kulturstipeanddaid
Ishavskraft lea juohkán kulturstipeandda njealji nurrii Finnmárkku ja Romssa fylkkas. Kulturstipeandda ulbmil lea addit doarjaga nuoraide gaskkal 15 ja 25 jagi. Kandidáhtat galget orrut dahje leat eret Davvi-norggas - ovdamunni jus leat eret Finnmárkkus dahje Romssa fylkkas.
Oktiibuot lea stipeanda 100.000 ruvnnu, ja galgá juhkkojuvvot ovtta dahje máŋga ohccái geat cevzet Ishavskraft eavttuid.
– Go lea servodatoasálasti mii fokusere guoddevašvuođa ja boahtteáiggi nuoraide ja mánáide, de lea dehálaš doarjut olbmuid ja organisašuvnnaid mat barget fátmmas ja doaibmevaš báikkálašbirrasa ovddas, čállá Ishavskraft preassadieđáhusas.
Dán jagi nominerejuvvo 19 nuora. Ishavskrafta jury mearridii juohkit kulturstipeandda dáid taleanttaide:
25.000 ru: Gjermund Johansen
25.000 ru: Ida Karoline Nordgård
25.000 ru: Julia Alieva
25.000 ru: Ellen Holandsli Engenes
Gjermund Johansen lea 22 jagi boaris ja lea eret Álttás. Su váldočuojanas lea klarineahtta. Son lea vázzán musihkkasuorggi Álttá joatkkaskuvllas ja geargá dán jagi bachelorgrádaoahpuin doaimmahusmusihkas Musihkkakonserváhtoris Romssas. Čakčat son joatká masteroahpuin, gos son fokusere klarineahttasolistan.
Ida Karoline Nordhård lea 23 jagi boaris ja lea Báhccavuonas eret. Son lea vázzán musihkasuorggi Kongsbakken joatkkaskuvllas ja lea geargan diibmá njeallje jagi guhkes bachelorgrádaoahpuin Musihkkakonserváhtoris Romssas. Su váldočuojanas lea elektrovnnalaš bássačuojanas. Čakčat son álgá mastergrádaohppui Musihkkakonserváhtorii.
Julie Alieva lea 18 jagi boaris, Ruoššas eret ja bajásšaddan Hámmárfeasttas. Son lea geargan skuvllavázzimin Kongsbakken joatkkaskuvllas Romssas. Son fárre Osloi, ja álgá bacheloroahpuin dánsumis Norgga dánsunallaskuvlii.
Ellen Holandsli Engenes lea 23 jagi boaris, Romssas eret. Su váldočuojanas lea klassihkalaš saksofovdna. Son lea vázzán Kongsbakken joatkkaskuvllas, ovtta jagi Toneheim álbmotallaskuvllas, ovdalgo álggii bachelorgrádaohppui fágaoahpaheaddjin musihkas Musihkkakonserváhtorii Romssas.