GOLBMA BELLODAGA nannejit NSR eanetlogu
Gii beassá ráđđelahttun dán njealljásis?
Presideantaevttohas Aili Keskitalo lea ožžon stuorát eanetlogu boahtte njealji jahkái Sámedikkis ja muitala sii leat soahpan ovttasbarggu Åarjel-saemiej Gïelhain, Johttiidsápmelaččaid listtuin ja Guovddášbellodagain.
Presideantaevttohas Aili Keskitalo lea ožžon stuorát eanetlogu boahtte njealji jahkái Sámedikkis ja muitala sii leat soahpan ovttasbarggu Åarjel-saemiej Gïelhain, Johttiidsápmelaččaid listtuin ja Guovddášbellodagain.
Golggotmánu 11. beaivve vuođđuduvvo ođđa Sámediggi, Norgga Sámiid Riikkasearvi (NSR) lei válgavuoiti ja ovttas NSR/SÁB:IN leat sis 18 áirasa Sámedikkis boahtte njeallje jagi. Vahkku maŋŋá válggaid lea NSR presideantaevttohas Aili Keskitalo iežas joavkkuin bargan gávdnat ovttasbargoguimmiid, dál lea bargu loahpahuvvon. NSR lea soahpan ovttasbarggu Åarjel-saemiej Gïelhain, Johttiidsápmelaččaid listtuin ja guovddášbellodagain.
– Mii leat ovttaoaivilis guovddáš ámmát juohkimin, muhto eat almmut dan ovdal go buot lea gárvvis. Mii leat soahpan ásahit sámedikkestivrejumi golmma eará bellodagain, lohká NSR presideantaevttohas Aili Keskitalo.
Ii leat čielga NSR ráđđi
Aili Keskitalo ii hálit vuos maidige almmuhit, muhto gažaldahkii ahte lea go čielga NSR ráđđi, de vástida son ná:
– Ii leat, muhto eambbo in hálit kommenteret. Leat šiehttan ahte mii eat almmut ovdal go buot lea sajis, geardduha Keskitalo. Son ii ge hálit almmuhit galle bellodaga šaddet leat ođđa ráđis.
Ovddit NSR ráđis ledje dát ráđđelahtut Silje Karine Muotka, Björn Thomas Åhrén, Henrik Olsen ja Ann-mari Thomassen, Thomassen ii leat šat sámediggeáirras, ii ge searvan válggaide.
– Ođđa ráđđái leat maiddái oahpes namat, eambbo in hálit kommenteret, vástida Keskitalo gažaldahkii gallis ja geat ovddit ráđis jotket ráđđelahtuin.
– Buohkat galget beassat váikkuhit
Vaikko NSR:S lea stuorra eanet- lohku Sámedikkis, de muitala Aili Keskitalo ahte sii leat háliidan čielga eanetlogu boahtte njeallje jagi.
– Dat mearkkaša ahte mii fertet fállat juoidá earáide. Buot šiehtadallamiin lea nu ahte ferte addit fálaldagaid mat leat geasuheaddji, sáhttet leat politihkalaš áššit ja vuoruheamit dahje posišuvnnat. Min áigumuš lea ahte buohkat galget leat duđavačča ja dovdat ahte sii besset leat mielde váikkuheamen. Dan dihtii háliidat sihkkarastit vai ovttasbargoguoimmit besset váikkuhit beaivválašbargguide, čilge Keskitalo go NSR lea válljen addit ráđđesaji ovtta dahje guovtti ovttasbargobellodahkii.
Jáhku ovttasbargui
Aili Keskitalo vástida hui várrugasat ahte ii duostta vel dadjat iežas duhtavažžan, go buot bealit eai leat sajis iige politihkalaš ovttasbargojulggaštus leat vel vuolláičállon.
– In sáhte lohkat ahte lean duđavaš go buot ii leat vel sajis, muhto lean duđavaš válggain ja mus lea jáhkku ovttasbargui dáinna golmmain bellodagain. Šaddá ovttasbargu mii lea buorrin Sámediggái ja Sámi servodahkii, lohká Aili Keskitalo.
Bealit leat dál soahpamin politihkalaš álggahanvuođudokumeantta.