SIHKKARASTE Norgga cupa saji
Nordlysa spábbačiekčanjoavkku 4. divišuvnna albmát sihkkaraste goalmmát saji ráidočiekčamis, ja sihkkaraste maiddái saji Norges cupii, go časke Indrefjorda/lávželuovtta 4-1 lávvardaga Niitoguolbanis, Kárášjogas. Nordlysa eanemus moallačiekči guovttos, Mats Petter Utsi ja Jon Andreas Rognerud Eira sávvaba ahte Nordlys beassá čiekčat Norgga alimus dási joavkkuid vuostá Norges cupas.
Boahtte jagi besset Nordlys 4. divišuvnna spábbačiekčanjoavkku albmát čájehit fámuideaset Norgga meašttirgilvvuin spábbačiekčamis, ja dasa sii illudit. Ovdal lávvardaga čiekčamiid, de leigga Jon Andreas Rognerud Eira ja Mats Petter Utsi goabbáge bidjan 11 moala Nordlysa ovddas ráidočiekčamis. Maŋŋil čiekčamiid leat Eiras 12 moala ja Utsis 13 moala oktiibuot. Nordlysas ii leat dán ráidočiekčamis go okta čiekčan vel ja dat lea Norild vuostá Čáhcesullo goanstarássešiljus boahtte vahkus, ja dalle mearriduvvo gii šaddá Nordlysa eanemus moallačiekči dán jagi. Lávvardaga čiekčamiin čievččastii Jovnna Ivvár Guttorm ovtta ja vuosttaš moala Lávželuovtta vuostá, Jon Andreas Rognerud Eira maid bijai ovtta moala, ja Mats Petter Utsi fas guokte.
Lei dehálaš vuoitit
Mats Petter Utsi gii čievččastii guokte moala Lávželuovtta vuostá muitala dán čiekčama lei dehálaš vuoitit.
– Dat lei buorre časkit Lávželuovtta, hui dehálaš, go lei bággu odne vuoitit jus galggaimet goalmmát saji sihkkarastit. In jáhke ovtta ge vuordán ahte mii galggaimet dahkat ná bures dán jagi. Diibmá šattai Nordlys measta 5. divišuvdnii, ja dál leat goalmmádin 4. divišuvnnas, muitala Mats Petter Utsi.
Plána lei vuoitit
Jon Andreas Rognerud Eira, gii lea erenoamáš bures dán jagi čiekčan Nordlys ovddas, lei duhtavaš vuoittuin ja muitala sii ledje jo ovdal čiekčama plánen vuoitit.
– Dat lei somá, dat lei justa nie go leimmet šiehttan ovdal čiekčama, ahte mii galgat vuoitit dan maŋimuš ruovttučiekčama dán jagi, muitala Jon Andreas Rognerud Eira.
Ná bajás joavdat ráidočiekčamis, dan birra ledje jo mannan dálvvi háleštan.
– Mii hálešteimmet dálvit jo, go álggiimet hárjehallat, ahte mii áigut bajimuččaid searvái iežamet divišuvnnas, muitala Jon Andreas Rognerud Eira.
– Sáhttit joavdat vaikke man guhkás
Jon Andreas Rognerud Eira illuda beassat čiekčat Norges cupas, ja sus lea buorre jáhkku Nordlysii.
– Dat gal šaddá hui gelddolaš, dat šaddá somá. Jus mii bures čiekčat doppe mii sáhttit joavdat vaikke man guhkás. Soaitá mii beassat deaivat vel Norgga alimus dási joavkkuid, muitala Eira. Mats Petter Utsi lea ovttaoaivilis Eirain.
– Somá go beassat mielde Norges Cupii, ja maiddái dehálaš Nordlysii čiekčat buoret joavkkuid vuostá, muitala Mats Petter Utsi.
– Maid Eira jurddašat dan birra go Mats Petter Utsi dál lea eanet moalaid bidjan go don?
– Mats Petter lea bures čiekčan, ja son gal ánssáša dan. Nu lea spábbačiekčan, dat lea son gii eanemus moalaid bidjá, son lea buoremus, muitala Eira.
– Maid Mats Petter Utsi fas jurddašat dan birra go Jon Andreas Rognerud Eira lea bidjan ovtta moala unnit go don?
– Munnje lea dehálaš oažžut «toppskorer» namahusa. Dat lea somá, ja lea dehálaš, leaikkastallá Mats Petter Utsi.
– Gáttát go iežat nagodit beassat bajábeallái Mats Pettera«toppskorer»-listtus boahtte čiekčamis?
– Jo, dan gal doaivumis dagan, leaikkastallá Jon Andreas Rognerud Eira.
Mearkumin ja njuovvamin
Mats Petter Utsi muitala ahte soai Eirain várra eaba šatta čiekčat maŋimuš ráidočiekčama boahttevahkus, mii lea Norild vuostá, ja danin orru dál ahte Mats Petter Utsi bissu Nordlysa eanemus moallačiekčin.
– Mun in jáhke Nordlys čiekčá Norild vuostá buoremus joavkkuin. Mii leat dalle mearkumin ja njuovadeamen, in mun jáhke moai šadde vuolgit. Ean goit moai ja Jovnnain ainjo, mun in jáhke goabbáge vuolgá dohko, loahpaha Mats Petter Utsi.