ČOHKKE NÁVCCAID
ruovdemáđija vuostá
Aili Keskitalo (NSR), gii fargga lea fas sámediggepresideanta, lohká bures ipmirdit dan go Mátta-várjjaga boazodoallit lohket ruovdemáđija Suomas Girkonjárgii šaddat katastrofan sidjiide.
– Dan mun gal bures ipmirdan go iešalddis dat lea stuora sisabahkken. Dan mielde han galgá čađat leat trafihkka ja šaddá dakkár sisabahkken mii ii bisán goassege. Lean maid hui kritihkalaš plánaide danne go mis leat leamaš heajos vásáhusat Nordlandsbaneniin, gos olu bohccot vuojáhallet jahkásaččat. Dan áššái lea leamaš nu unnán beroštupmi eiseválddiin ja ruovdemáđijadoaimmahagas, dadjá son.
Rahpá geainnu earáide
Keskitalo muittuha dás ii leat sáhka dušše ruovdemáđijas. Infrastruktuvra lea dál ásahuvvome danne vai láhčá saji vel eambbo doaimmaide davás.
– Okta sivva manne politihkalaččat, sihke davviriikkalaččat ja árktalaččat, áŋgiruššet ásahit ođđa fievrredanlinnjáid, lea go galgá šaddat álkibun ja hálbbibun ráhkadit industriijaguovlluid árktalaš guovlluide. Dat dahká álkibun álggahit ruvkkiid ja earálágan industriija.
Son lea eahpesihkar man dásis ášši lea dál, muhto sus lea doaivva sámedikkiid ja boazodoalu beassat váikkuhit dán guhkes proseassas. Son navdá gal dál juo šaddat lossadin vuosttaldit huksema.
– Orrot dakkár plánat main lea oalle stuora doarjja politihkalaččat, ja dađi bahábut maid dat geat muđui lávejit leat veahkkin boazodollui ja sámi beroštumiid doarjut luonddugáhttema dihte, sii hui dávjá dorjot ruovdemáđija huksema prinsihpalaččat dálkkádatpolitihkalaš ákkaiguin. Dien gal ipmirdan, muhto dán ferte geahččat ollislaččat. Jearašin lea go ávkin lundui ja birasgáhttemii jus ruovdemáđidja boahtá biebmobuvttadeami ovdii. Lea go dalle ávkin lundui ja birasgáhttemii, go de han ferte eambbo buktagiid viežžat guhkkin, jearrá son.
Čohkket fámuid
Keskitalo lohká dehálažžan dál gulahallat Suoma beale sámiiguin, sihke boazoealáhusain ja Sámedikkiin.
– Lea dehálaš dál leat gozuid alde, ja gulahallat bures singuin geaidda ášši čuohcá, maiddái Suoma Sámedikkiin. Mun árvidan ahte Suoma Sámediggi lea maid vuostá daidda plánaide. Mii fertet sihkkarastit ahte čielggadit albma ládje movt dat váikkuha lundui ja sámi ealáhusaide. Jus lea stuora goarádussan, de fertet čohkket návccaid ja hutkat oktasaš strategiijaid, dadjá Keskitalo.