Sihkkareamos dálkkás ruđahisvuhtii
Danne lea ge dehálaš láhčit dili nu ahte lávki bargoeallimii ii dárbbaš leat nu lossa ja stuora lávki man ii oba oro ge nákcemin váldit.
Guovdageainnu suohkana politihkalaš jođihangoddi áigu álggahit doaibmabijuid láhčit sadjái bargosajiid ja doaimmaid eastadan dihte bargguhisvuođa ja hástalusaid mat gusket mánáidgeafivuhtii.
Statistihkalaš guovddášdoaimmahat ovdanbuvttii njukčamánu dán jagi loguid mat čájehit ahte goasii 100 000 máná Norggas ellet bissovaš geafivuođas. Guovdageainnu logut čájehit ahte leat 19,4 proseantta mánáin, dahje 108 máná, geat ellet dállodoaluin gos lea bissovaš unnán dienas. Dat mearkkaša ahte Guovdageaidnu lea dat suohkan Norggas gos nubbin eanemus mánát ellet bissovaš geafivuođas. Guovdageainnus eallá birrasii juohke viđát mánná eallá dákkár dilis.
Seammás lea Guovdageainnu suohkan njunnošiid gaskkas Finnmárkku bargguhisvuođastatistihkain. Guovdageainnu sátnejođiheaddji ii leat duhtavaš daiguin loguiguin ja lohká Ávvirii ahte sis lea mihttu oažžut dien guokte logu nu vulos go vejolaš. Sátnejođiheaddji lohká ahte lea dehálaš láhčit bargosajiid mat eai gáibit alla oahpu, muhto masa olmmoš lea mielas searvat ja kánske háhkat alcces bargosaji. Guovdageainnu suohkan lea ge dál bargamin ásahit mátkeealáhusaid suohkanii, ja suohkan ovttasbargá dál sámi ealáhusgárddiin ja suohkana ealáhusaiguin.
Sátnejođiheaddji lohká ge ahte bargosajit leat sihkkareamos dálkkás ruđahisvuhtii. Dát lea buoremus vuolggasadji bargagoahtit váttisvuođain. Vaikko lea dárbu doaibmabijuide mat veahkehit bearrašiid ja mánáid geain leat heajos ruhtadilli jođánit ja doaimmaiguin mat leat heivehuvvon sin dárbbuide dál ja dás, de lea čoavddus guhkesáiggi geahčesteamis bargosajit. Deháleamos doaibmabidju eastadit geafivuođa, sihke dál ja boahtteáiggis, lea veahkehit olbmuid beassat bargomárkanii. Oahppu lea dávjá čoavdda bargoeallimii, muhto go olbmuin ii leat oahppu, de ii leat álki fidnet barggu. Danne lea ge dehálaš láhčit dili nu ahte lávki bargoeallimii ii dárbbaš leat nu lossa ja stuora lávki man ii oba oro ge nákcemin váldit. Bargosajit maidda ii gáibiduvvo alla oahppu rahpet vejolašvuođaid oallugiidda beassat aktiivvalaččat searvat servodateallimii ja bargoeallimii. Mátkkoštanealáhus man Guovdageainnu suohkan dál áigu nannet lea buorre álgu.