– Deháleamos lea ahte Arnar beassá julggiid ala
Arnar Vuolab Jørgensen ja su eadni gáibideaba buhtadusa go oaivvildeaba ahte Kárášjoga gielda ii dahkan maidege eastadit ja bissehit givssideami.
NRK čájehii mannan vahkku dokumentára Arnar Vuolab Jørgensen birra, gii givssiduvvui Kárášjoga skuvllas. Givssideapmi lei nu roavis ja garas ahte lea váikkuhan nuorra bártni eallima, dan muddui ahte sus ii leat dál rávisolmmožin dábálaš árgabeaivi. Givssideapmi šattai nu vearrái ahte Arnar ja su eadni Ann Mary Vuolab fárriiga lulli-norgii, beassat eret givssideamis.
– Gielda ferte dál ordnet veahki Arnarii, go dalle eai dahkan maide. Sis lei buorre dilli ja áigi veahkehit muhto dan eai dahkan. Dál fertejit loktet su, go son dárbbaša veahki beassat viidáseappot máilmmis, lohká eadneolmmoš.
Advokáhta váldán veahkkin
Soai leaba váldán oktavuođa advokáhtain, ja leat dál gávnnaheame juste movt givssideapmi lea váikkuhan Arnara eallima. Sii áigot gáibidit Kárášjoga gielddas buhtadusa vai Arnar beassá dábálaš eallima eallit.
Eadneolmmoš muitala ahte bárdni lea massán olu oahpu ja maiddái olbmáid, ja ahte áin čuohcá sihke fysalaččat ja psyhkalaččat.
– Buhtadus ii lokte buoret dili, muhto veahkki lea ruhta vai birge máilmmis. Lea buot deháleamos beassat julggiid ala, vai beassá ieš hommát. Áidna lea ahte adno ruhta vai beassá ieš birget, lohká AnnMary. NRK Sápmi muitalii vuosttažiin dán ášši birra.
Doaivva boahtteáigái
Eadneolmmoš muitala ahte lea lossa árgabeaivi, ja ahte son lea bargan buot maid lea nagodan, veahkehit iežas bártni.
Son lea dorvun leamaš, go ii leat ieš doaibman. Son maid oaidná man lossa dilli su bártnis lea, muhto lea doaivva čuvges boahtteáigái, vaikko sáhttá guhká ádjánit.
– Mus lea doaivva Arnar fidne olbmáid geat váldet su fárrui. Dieđán dat ii boađe gohččumiin, muhto ii dáinna lágiin šatta dearvvas go leat garra dovddut čoggon su oaivái, lohká Vuolab.
Easka guorahallame
Advokáhtta Arvid Kjaervik lohká ahte dát doaivumis boahtá čuovvut Arnara olles eallima.
– Lea duođalaš ášši, mii lea garrasit čuohcan dán bárdnái. Mu mielas lea hui duođalaš. Mii leat dál kárteme makkár medisiinnalaš váikkuhusat dás leat leamaš Arnarii, ja go dan leat dahkan de geahččat ášši fas ođđasit, lohká Kjaervik. Moatti mánu geahčen soaitá váidda gárvvis, ja dan ovdal Kjaervik ii hálit kommenteret váidaga.
Bealálaš
Kárášjoga ráđđeolmmái Kurt Maurstad ii hálit kommenteret ášši, ja lohká ahte ferte oaidnit mii dáhpáhuvvá. Son maid lasiha ahte soaitá geavvat nu ahte šaddá habilitheta-gažaldat su ektui dán áššis, go son lea Ann-mary Vuolab fuolki.
– Sáhttá šaddat nu ahte lea sátnejođiheaddji gii dán ášši jođiha, lohká Maurstad.
Ávvir lea geahččalan oažžut sihke sátnejođiheaddji Svein Atle Somby ja várresátnejođiheaddji John Nystad ságaide kommenteret ášši, muhto ii leat lihkostuvvan.
Buorránan dilli
Kárášjoga skuvlla rektor Jan Gunnar Johansen logai mannan vahkos Ávvirii ahte dilli lea sakka buorránan dan rájes go Arnar lei sin oahppi.
Johansen muitala ahte skuvlla bealis leat prošeavttat boahtán johtui, mat galget eastadit givssideami. Earret eará leat guokte bargi geat bargaba Pals-modeallain. Dan modealla ulbmil lea loktet sosiála ja skuvlafágalaš oahppama.
Sii dihtet maid ahte givssideapmi dávjá dáhpáhuvvá skápma beallái, ja dan áigot dustet lassi bearráigeahčuin. Áigot maid bovdet logaldalliid muitalit ohppiide givssideami birra.
– Mii leat maid rievdadan rutiinnaid, ja čuovvolit givssida- náššiid nu johtilit go vejolaš. Čuovvolan leat ovdal maid, muhto rutiinnat eai soaitán nu bures sajis go dál leat, lohká Johansen.
Ii sáhte buohtastahttit
Johansenis lea nubbi skuvlajahki rektorin dál, ja danne ii loga sáhttit buohtastahttit dálá dili, dainna diliin mii lei 2009:s. Son ii lean barggus hálddahusas dalle.
– Muhto dieđán ahte dalle lei eambbo givssideapmi, lohká son.