– Lean ilus go viimmat válljejuvvui nissonolmmoš
– Lean hui ilus go viimmat válljejuvvui nissonolmmoš ámmáhii. Lean dieđusge hui rámis, vuollegaš ja veaháš hirpmástuvvan go lean ožžon dan luohttámuša. Illudan álgit bargui, go liikon jođihit, ja mus lea maid hárjáneapmi jođihanbargguide. Lean maid hui ilus go beasan leat ollesáigge politihkkár Sámedikkis, lohká ođđa álgi dievasčoahkkinjođiheaddji Elisabeth Erke (Bargiidbellodat). Son lea maid Deanu várresátnejođiheaddji ja lea Deanu musea jođiheaddji. Guktot sajiin ferte dál ohcat virgelobi go boahtte vahkku rájes doaibmagoahtá dievasčoahkkinjođiheaddjin.
Áigi válmmas
Elisabeth Erke lea vuosttaš nissonolmmoš ámmáhis maŋŋá go Sámediggi 2001:s rievdadii čoahkkinortnega ja dievasčoahkkinjođiheaddji šattai bajimuš hoavdan Sámedikkis, ja lohká dan čalmmustahttit hástalusa mii duos dás digaštallo, ahte nissonolbmui lea hástaleaddjin leat politihkas.
– Lea dehálaš ahte nissonolmmoš oažžu dehálaš posišuvnnaid maiddái politihkas. Lea hui illudahtti
mearrádus, ii ge leat amas ášši ahte lea hástaleaddji leat nissonpolitihkkárin, lohká son.
Máhcahit árbevieru fas ruovttuluotta
Ovdal go Sámediggi vuođđuduvvo golggotmánu 11.-12. beaivvi 2017:s leat Norgga Sámiid Riikasearvi (NSR) ja Bargiidbellodat, mat leat Sámedikki guokte stuorámus joavkku, čoahkkinastán das mo bargu Sámedikkis galgá jođihuvvot boahttevaš áigodagas. Ságasteami duogáš lea ahte juovlamánus, go Bargiidbellodat ovttas eanetloguin mearridedje bálkestit NSR unnitlogu stivrejumi, de mearridii ođđa eanetlohku doalahit dievasčoahkkinjođiheaddji ámmáha ii ge addit NSR opposi- šuvdnii dan ámmáha nu mo lea Sámedikkis leamaš árbevierrun. Dievasčoahkkinjođiheaddji ámmáha vieru leat buot bellodagat Sámedikkis árvvus atnán, ja lea doaibman sihkkarastit ahte opposišuvnnas leat čielga doaimmat ja rollat Sámedikkis.
– Mii oaivvildat ahte Sámedikki vieru mielde gullá dievasčoahkkinjođiheaddji ámmát opposišuvdnii prinsihpalaččat. Dan bokte oidno opposišuvnna rolla Sámedikkis, lohká Nsr-presideantaevttohas ja álgi sámediggepresideanta Aili Keskitalo preassadieđáhusastis.
Dehálaš doaibma
Bargiidbellodat oaivvilda dáinna ortnegiin šaddat vissis fápmodási posišuvnna ja opposišuvnna gaskka ja ahte das lea dehálaš doaibma Sámedikkis.
– Dat mii dáhpáhuvai mannan juovlamánus, mielddisbuvttii ahte mii eat fuolahan dan. Mis leamaš buorre gulahallan NSR:IN dán áššis, lohká Bargiidbellodaga parlamentáralaš jođiheaddji Ronny Wilhelmsen preassadieđáhusastis.
Sámásta
Elisabeth Erke oaivvilda ahte dievasčoahkkinjođiheaddji lea lađas mii čatná opposišuvnna ja posišuvnna oktii ja lohká illudit ovttasbargui buot bellodagaiguin.
– Lean hui ilus go doalahit árbevieru addit opposišuvdnii ámmáha, nu doalahat dási Sámedikkis, dadjá Erke, guhte máhttá sámegiella.
– Áiggun sámástit nu bures go sáhtán, mun in oaivvil giella lea váttisvuohta ja duos dás oahpan ođđa sániid, lohká Elisabeth Erke.
Sámedikki ásahushistorjá
Bargiidbellodat ja NSR leat ovttaoaivilis ahte dievasčoahkkinjođiheaddji prinsihppa galgá čállot čálalaččat njuolggadusaide vai čuovvuluvvo boahtteáiggis.
– Mun oaivvildan ahte Sámediggái lea buoremus joatkit daid čálalaš ja čálekeahtes vieruid. Lea dehálaš oassi parlamentáralaš vierus ja oassi Sámedikki ásahushistorjjás, loahpaha Aili Keskitalo.
Deatnulaš Elisabeth Erke lea rámis, vuollegaš ja hirpmástuvvan go válljejuvvui dievasčoahkkinjođiheaddjin.