– Máilmmi buorre go árvvoštallet
Sirpmá gilisearvi lei diibmá dáhtton Fefo árvvoštallat 5-kilomehterávadaga go sin mielas dat doaimmaid bures go lei fámus ja dál lea gilisearvvi jođiheaddji ilus go Fefo stivra áigu árvvoštallat ášši stivračoahkkimis.
Mannan jagi attii Sirpmá gilisearvi cealkámuša Finnmárkkuopmodahkii ahte galggašedje fas bidjat fápmui dan 5-kilomehterávadaga. Gilisearvvi jođiheaddji Britt Hjørdis Somby lohká leat máŋga beali manne dat galggašii boahtit fas fápmui. Son ákkasta ahte dál ii leat nu buorre bearráigeahčču galle bivdokoartta leat vuvdon ja ahte lea stuorra johtolat Suoma turismmas.
– Sii geavahit guovllu, muhto ii leat oktage gii čuovvu mielde, sihke nuoskkideami ja dat guolásteamis dáfus, mo daid jávrriid goldet, lohká gilisearvvi jođiheaddji.
Máilmmi buorre
Su mielas lea hui buorre go orru ahte Fefo lea gullan sin cealkámušaid ja sis leat leamašan čoahkkimat Fefoin dán oktavuođas.
– Dalle oaččuimet dan áddejumi ahte dát lea dákkár ášši mii ii boađe stivrii goit vel. Jus leat dál fuomášan fáhkkestaga ahte áigot árvvoštallat, de lea máilmmi buorre min mielas, dadjá son.
Friijavádjoleapmi duoddaris
– Lean giitevaš go váldet dán áššši ovdan fas ja guovllu olbmot besset árvvoštallat ja dain leat vásáhusat dan áiggis gos lea leamaš dat friijavádjoleapmi duoddaris, loahpaha Britt Hjørdis Somby.