– Sámegiel šilttat eai berre leat apmasat
Romssa gávpogis leat olu almmolaš ásahusat šilten sámegillii, ja danin eai berre dat leat apmasat romsalaččaide, oaivvilda boahttevaš sámediggepresideanta Aili Keskitalo. Son háliida áinnas ságastallat sámegiel šilttaid birra sátnejođiheddjiin.
Sámedikkis ja Romssa suohkanis lea ovttasbargošiehtadus mas lea čállon ahte suohkan šilte sámegillii doppe gos oaidná dan ulbmillažžan. Go bealit deaivvadit geahčadit šiehtadusa dán čavčča, de háliida áinnas boahttevaš sámediggepresideanta Aili Keskitalo ságastallat šiltema birra Romssa sátnejođiheddjiin.
– Sámegiel šilttat livčče muittuhussan ahte Romssas orrot sámit. Dá lea hui fiinna ja jaskadis vuohki čalmmustahttit sámevuođa, lohká son.
Nanne mánáid ja nuoraid identitehta
Go Aili Keskitalo galleda báikkiid ja almmolaš ásahusaid gos leat šilten sámegillii, de dovdá iežas dohkkehuvvon, bures boahtimin ja ruovttus.
– Dát addá hui buori dovddu ja sámegiel šilttat livččii mielde nannemin Romssa mánáid ja nuoraid sámi identitehta vaikke orrot gávpogis gos dárogiella ja kultuvra muđui dominere. Oaivvildan maiddái ahte romsalaččaide eai berre sámegiel šilttat apmasat go doppe leat olu almmolaš ásahusain šilten sámegillii, lohká Keskitalo.