– Čuođi jagi áigi ii livčče boazosámibárdni geahčestan ge mearrasámi niidii
Ikte oidnui NRK:S Tvráiddu «I gode og onde dager» maŋemus oassi. Dan oasis muitaleigga Terese Olli Sara ja Ole Morten Sara iežaska ráhkisvuođa ja ovttaseallima birra.
NRK Tv-ráiddu maŋemus oasis «Til døden skiller oss?» Ole Morten ja Terese muitaleigga movt soai deaivvadeigga, soagŋofáru ja hástalusaid birra maid leaba vásihan. Terese lea mearrasápmelaš Porsáŋggus eret ja Ole Morten ges boazosámibearrašis bajásšaddan Guovdageainnus.
– Čuođi jagi áigi ii livčče boazosámibárdni geahčestan ge mearrasámi niidii, logai Terese áhčči go son muitalii geainna son áiggui náitalit. Goitge leat sudno eallimis leamaš eará hástalusat go juste dat.
Čiekŋalis dovddut bohtet oidnosii
Ávvir lea humadan Ole Morteniin ovdal go sudno oassi oidnui TV:S. De logai Ole Morten iežaska oalle gealdagasas ja illudeigga oaidnit dán oasi TV:S.
– Oalle gealdagasas letne, muhto orru gal veahá issoras maid. Doppe bohtet olu čiekŋalis dovddut oidnosii ja muittán ahte lei oalle issoras dalle go filbmejedje. Goitge lei gal hui somá ovtta ládje leat mielde. Moai áigo dáppe ruovttus guovttá geahččat dan, ii leat jurdda gal bovdet earáid munnuin ovttas dan geahččat, muitala Sara.
Go boazosápmelaš ja mearrasápmelaš náitaleaba
Son muitala ahte Tv-ráiddus bohtet ovdan fáttát maid háliideaba loktet oidnosii nu go kultuvra náitaleami oktavuođas.
– Okta ášši, mii goit boahtá ovdan das, lea sámi náitalanvierru, nu go soagŋofárru. Dat lea munnje leamaš hui dehálaš, lean álo jurddašan ahte jus fal náitalan goasse, de mun vuoddján soagŋofárrui vai dat árbevierru ii noga. Nubbi fáddá lea maid go boazosápmelaš ja mearrasápmelaš náitaleaba, dat ii lean dološ áiggi nu vuogas. Die leat guokte fáttá mat goit bohtet ovdan mat sáhttet boktit digaštallama ja loktet ovdan dan ahte diet áigi ii leat mis šat dal, muitala Ole Morten Ávvirii ovdal go Tv-ráiddu maŋemus oassi oidnui.
Háliidedje čalmmustahttit sámi náitalanvieruid
Ole Morten muitala ahte lei veahá soaittáhagas ahte soai gárttaiga dán ráidui mielde.
– Lei nu ahte oinniime dieđu NRK:S ahte ledje ohcame sámi bára go háliidedje čalmmustahttit sámi náitalanvieruid. Moai sáddiime de ohcama sisa álggos dušše suohttasa dihte, muhto de šattai goit nu ahte sii háliidedje munno mielde Tv-ráidui.