Deanosoahpamuš rievdaduvvo
Suoma eana- ja vuovdedoalloministeriija spesiálaráđđeaddi lohká leat menddo árrat dadjat makkár rievdadusat dahkkojit Deanosoahpamušas.
Suoma eana- ja vuovdedoalloministeriija čielggadišgoahtá lea go Deanosoahpamuš dagahan čuolmmaid Ohcejoga gildii. Suoma riikabeaiveáirras Matti Torvinen lea lohkan YLE Ođđasiidda ahte boahtte dálvvi lea buorre dahkat nuppástusaid Deanosoahpamuša doaibmabijuide, ja atná dehálažžan ahte guovllu olbmuid rievttit eai gáržžiduvvo ja ahte ohcejohkalaččaid rievttit máhcahuvvojit seamma dássái go ovdal ođđa soahpamuša.
Čadnon luosanáli dillái
Suoma eana- ja vuovdedoalloministeriija spesiálaráđđeaddi Satu-marja Tenhiälä dieđiha ahte sii dahket rievdadusaid soahpamušas boahtte dálvvi.
– Guktot riikkat, sihke Suopma ja Norga, áigot árvvoštallat Deanosoahpamuša juohke jagi ja
geahčadit leat go spiehkasteamit guolástannjuolggadusain. Vejolaš spiehkasteamit leat čadnon luosanáli dillái, čállá spesiálaráđđeaddi Satu-marja Tenhiälä e-poasttain Ávvirii.
Álggahan barggu
Son lohká dát lea dábálaš bargovuohki ja sii áigot vuosttaš geardde boahtte dálvvi árvvoštallat soahpamuša.
– Mii leat álggahan barggu ohcat dieđuid iežamet árvvoštallamiidda ja leat álggahan árvvoštallanevttohusa barggu, cealká Satu-marja.
Ođđa soahpamuš dagahan váttisvuođaid
Ávvir muitalii borgemánus makkár heahtedilis Ohcejoga gielda ja gieldda ássiid smávva fitnodagat leat, go illá leat dinen maidige maŋŋá go dat ođđa Deanosoahpamuš doaibmagođii. Muhtin fitnodagat eai dinen maidige mannan geasi. Ođđa bivdovuovdinlobi vuogádat ii leat doaibman ja lea dagahan váttisvuođaid Suoma bealde.
Teknihkalaš rievdadusat
Spesiálaráđđeaddi muitala ahte sis leat seamma ortnegat Ruoŧain,
go lea sáhka Duortnosjogas, muhto son ii sáhte muitalit makkár rievdadusat dahkkojit boahtte dálvvi.
– Lea menddo árrat dadjat makkár rievdadusaid áigot dahkat, muhto dat mearkkaša ahte guolástannjuolggadusain dahkkojit teknihkalaš rievdadusat. Mii eat rievdat olles Deanosoahpamuša, deattuha Suoma eana- ja vuovdedoalloministeriija spesiálaráđđeaddi Satu-marja Tenhiälä.