Fargga fertet molsut dálverieggáide
Čakča lea juo dás ja dál lea fargga áigi dálverieggáid fas molsut biilii. Jus leat biikkahis dálverieggát, de sáhtát molsut goas ieš háliidat. Muhto jus leat biikarieggát, de lea vissis beaivi goas daid sáhtát molsut. Golggotmánu 16. beaivvi rájes lea lohpi vuodjit biikarieggáiguin Nordlánddas, Romssas ja Finnmárkkus. Muđui Norggas lea easka maŋŋá skábmamánu 1. beaivvi.
Vuoddjis lea ovddasvástádus ahte biillas lea doarvái coakci oppa áigge. Dát mielddisbuktá ahte jus siivu gáibida biikarieggáid, de fertet daid molsut ovdal dan beaivvi.
Erenoamáš čakča
Jus lea gálja, de lea hui čielggas ahte lea sihkkareamos vuodjit dálverieggáiguin ovdal go geasserieggáiguin. Jus leat biikkahis dálverieggát, de sáhtát molsut goas ieš háliidat. Dálverieggáid minsttarčikŋodatgáibádus lea golbma millimehtera.
– Mis lea leamaš erenomáš liekkas ja beaivvádat čakčamánus, muhto golggotmánus de čoskkiida, ja dalle šaddá maid gálja, dadjá Stáhta geaidnodoaimmahaga davviregiovnna Johtolat- ja mohtorfievroossodaga direktevra Jørn Simonsen.
Geahča dálkedieđáhusa
Jus lea dieđihuvvon muohtti, gáljasiivu dahje čoaskkis dan guvlui gosa leat jurddašan vuodjit, dalle sáhtát molsut biikarieggáide ovdal golggotmánu 16. beaivvi davimus fylkkain ja ovdal skábmamánu 1. beaivvi máddin.
silje@avvir.no