– Dehálaš gudnejahttit guhkes ovttasbarggu JSL:IN
Njeallje lahtu Norgga Sámiid Riikkasearvái ja okta lahttu juhkkon guovtti bellodahkii.
Ovttasbargobellodagat Norgga Sámiid Riikkasearvi, Guovddášbellodat, Åarjel-saemiej Gïelh ja Johttisápmelaččaid listu (JSL) ovdanbukte mánnodaga ovttasbargošiehtadusa váldočuoggáid. Ođđa sámediggeráđđi maid almmuhuvvui, ja leat dat ráđđi man Keskitalo evttoha jus válljejuvvo presideantan duorastaga. Duorastaga leat sámedikkis siskkáldas posišuvdnaválggat.
Aili Keskitalo, Silje Karine Muotka, Henrik Olsen ja Mikkel Eskil Mikkelsen leat NSR bealis ráđis, viđát ráđđelahttu lea juhkkon guovtti lahttui. Johttisápmelaččaid listtu Berit Marie E. Eira ja Åarjel-saemiej Gïelh Ellinor Marita Jåma juogadeaba ráđđelahttu saji. Eira lea ráđđelahttu vuosttaš guokte jagi, ja Jåma fas čuovvovaš guokte jagi.
Bargame politihkalaš vuođđodokumeanttain
Ovttasbargobellodagat leat ain bargame politihkalaš vuođđodo- kumeanttain, man ovddidit presideantta válggaid oktavuođas duorastaga.
– Lea mannan oalle njuovžilit šiehtadallamiid oktavuođas, ja jáhkán šaddá buorre politihkalaš vuođđu ođđa Sámedikkis. Mii háliidit bargat dakkár eanetlogu koalašuvnna siskkobeale, ja mis leat dál ovttasbargoguoimmit maid mii muhtun muddui dovdat ovdalaččas. Dat lea ovdamunni go dalle lea álki gulahallat ja diehtit makkár áššit sidjiide leat dehálaččat. Mun lean dan dáfus optimista ja jáhkán lea dáhttu buot njealji joavkkuin bargat politihkain sámedikki vuogádaga siskkobealde, lohká Aili Keskitalo.
Golbma bellodaga ráđis, njeallje bellodaga ovttasbarggus
Ovttasbarggus leat njealje bellodaga, muhto duššo golbma bellodaga leat ráđis. Guovddášbellodagas ii leat ráđđelahttu, muhto sii nammadit politihkalaš ráđđeaddi, jođihit plána- ja finánsalávdegotti ja jođihit posišuvdnajoavkku siskkáldas vuođđoealáhuslávdegotti.
– Mii leat duhtavaččat go Guovddášbellodat lea searvan ovttasbargui, muhto midjiide lei dehálaš gudnejahttit ahte lea leamaš guhkes áiggi ovttasbargu Johttisápmelaččaid listtuin. Min mielas livčče leamaš boastut jus eat leat dan guhkes áiggi ovttasbarggu gudnejahttit. Dan leat čilgen Guovddášbellodahkii ja sii leat ožžon eará vejolašvuođaid.
Ođđa lahtut
Ođđa ráđđelahttu NSR bealis lea Mikkel Eskil Mikkelsen, Viesttarmeara válgabiires. Son lea vuosttaš háve Sámediggái válljejuvvon.
– Mikkel Eskil lea nominerejuvvon 1. sadjái ja dat mearkkaša ahte min organisašuvnnas Viesttarme-
aras lea luohttámuš sutnje. Dieđán son lea servodatberošteaddji ja čađaha maid lea mearridan. Mus lea miella addit min ođđa buolvva politihkkariidda vejolašvuođa čájehit maid máhttet, ja lea ovtta ládje boahtteáiggi investeren. Mikkel Eskil lea julevsápmelaš, ja mearkkaša min organisašuvdnii čájehit dan sámi máŋggabealatvuođa, lohká Aili Keskitalo.
Silje Karine Muotka ja Henrik Olsen leigga goappašagat ovddit NSR ráđis, ja joatkiba dál fas boahtte njeallje jagi.
– Munnje lea hui oadjebas dilli go dieđán mus eai leat duššo ođđa ráđđelahtut, muhto leat maiddái ráđđelahtut mat dovdet bures Sámedikki vuogádaga. Munnje lea leamaš dehálaš ahte galgá sihke hárjáneapmi ja kontinuitehta sámedikki barggus ja maiddái ođasmahttin, lohká Keskitalo.
Rahpan gaskavahkku
NSR almmuhii árabut dán mánu ovttasbargoguimmiid, Guovddášbellodat, Guovdageainnu johttisápmelaččaid listu ja Åarjelsaemiej Gïelh. Sii almmuhedje maid ahte ii šatta čielga NSR ráđđi. Sámedikki almmolaš rahpan lea gaskavahkku.