Kulturviesu geallára eai juollut láiggu haga
Guovdageainnu musihkkáriidsearvi lea leamaš hárjehallanvistti haga dan rájes go ovddeš hárjehallanvisti vuvdui.
Mannan mánu šattai veahá moivi go suohkanis lei muhtun bargi lohpidan kulturviesu geallára Guovdageainnu musihkkáriidsearvái. Illu ii bistán ii jándora ge, go beaivvi maŋŋel bođii fas diehtu ahte eai oaččo.
Čielggadan ášši
Guovdageainnu suohkana teknihkalaš ovttadaga ovttadatjođiheaddji, Sindre Murud, ii dovdan ášši ahte sii leat lohpidan musihkkáriidda kulturviesu geallára, muhto mieđihii ahte lea leamaš ságas.
– Kulturviesu geallir lea leamaš ságas, ja mii leat árvvoštallan galgat go láigohit dan musihkkáriidda. Eat lohpidan maide ovdal go árvvoštalaimet ášši. Čájehuvvui ahte nuoraidklubba geavahuvvo dan mađe olu eará lágidemiide, ahte šaddá hástalussan visot daid heaittihit, čilgii son.
– Geavahuvvo eará diŋggaide
Dál, go ášši lea meannuduvvon suohkanstivrras, vástida sátnejođiheaddji áššái.
– Nu go dilli lea dál, de ii leat musihkkáriidsearvvis visti gos besset hárjehallat. Besset go hárjehallagoahtit kulturviesu gealláris, lea dál váldon ovdan suohkanstivrračoahkkimis, gos meannuduvvui ahte suohkan gáibida beaiveláiggu das, muitala Johan Vasara. Nu go Murud, de muitala Vasara maid ahte kulturviesu geallir lea beakkán fálaldat, ja geavahuvvo olu eará diŋggaide.
– Go geallir juo geavahuvvo eará diŋggaide, earret eará riegádanbeaidoaluide, de eat sáhte beare addit dan vistti, čilge son.
Ohcet ain
Vasara ipmirda ahte beaiveláiggu geažil gártá dat divrras fálaldahkan musihkkáriidsearvái. Muhto suohkan doallá lohpádusa maid leat lohpidan.
– Mii leat lohpidan ahte galgat gávdnat sidjiide eará vistti, ja danne leat ain bargame gávdnat eará čovdosa sidjiide, dadjá son.
Dehálaččat suohkanii
Guovdageainnu musihkkáriidsearvi lea vuođđuduvvon máŋga jagi áigi, ja lea leamaš dehálaš Guovdageainnu beaggimii. Dat lea okta ákkain manne sii leat dehálaččat suohkanii.
– Mii háliidit gávdnat čovdosa musihkkáriidsearvái, go sii leat dehálaččat Guovdageidnui. Sii leat olahan ja buktán olu min gillái. Dasa lassin mii háliidit vuoruhit kultuvrra, čilge Vasara.
Ávvir ii lihkostuvvan oažžut Guovdageainnu musihkkáriidsearvvi jođiheaddji, Heaika Haetta, ságaide ovdal go aviisa deaddiluvvui.