Goalmmát geardde geahččala
Dál lea Aili Keskitalo almmuhan geaid váldá mielde ođđa Sámediggeráđđái gaskavahku rájes go ođđa sámediggeáigodat vuođđuduvvo. Nu mo ovdalaččas jo lei almmuhan, de lea válljen smávva listtožiid Åarjel-saemiej Gïelh ja Johttisápmelaččaid listtu lassin Guovddášbellodahkii, ovttasbargoguoibmin.
Keskitalo ja ovttasbargoguimmežagat leat guhkebuš soabadallamiid maŋŋil viimmat gergosat almmuhit guđe ládje háliidit čađahit ovttasbarggu, ja Sámedikki stivrejumi boahttevaš njeallje jagi. Son lea šaddan vuhtii váldit sihke geografiija, sohkabeali ja diehttelasat ráđđelahtuid gelbbolašvuođa go lea hábmen ođđa ráđi.
NSR bealis leat njealjis ráđis, ieš álgi presideanta ja de vel Henrik Olsen, Silje Karine Muotka ja Mikkel Eskil Mikkelsen.
Henrik Olsen ja Silje Karine Muotka leigga olusiid mielas lunddolaš ráđđelahtut, go sudnos lea guhkes politihkalaš hárjáneapmi ja dasa lassin leigga maid ovddit Nsr-ráđis. Mikkel Eskil Mikkelsen fas lea nuorra politihkkár, guhte ii leat nu olu beaggán ovdal go dán válgagiččus. Dattetge ii leat nu hirpmástuhtti go su leat válljen, go Keskitalo lea diehttelasat váldán vuhtii sohkabeali ja guovllu. Dasa lassin lea NSR okta dain bellodagain mas hui čehpet diktet nuorat politihkkáriid boahtit ovdan dehálaš posišuvnnain, ja sis lea árbevierru ovdánahttit iežaset nuorra politihkkáriid dáinna lágiin.
Dasto lei Keskitalos bargu válljet vel eará bellodagain dahje listtuin ráđđelahtu, ja lea ge de válljen ahte Johttisápmelaččaid listtu Berit Marie E. Eira ja Åarjelsaemiej Gïelh Ellinor Marita Jåma galgaba juogadit ráđđelahttoámmáha guokte jagi goabbáge.
Go almmuhii ovttasbargoguimmiid, de ii lean dat ge nu hirpmástuhtti, go son lea ovdal ovttasbargan sihke Johttisápmelaččaid listtuin ja Guovddášbellodagain Sámedikkis ja Sámediggeráđis. Mannan háve go sii ledje guimmežagat, de dattetge dat ii lihkostuvvan nu bures go son šattai dalle geassádit presideantan ovttasbargohástalusaid geažil. Danne soaitá ge dál garván Guovddášbellodaga ráđis, muhto nubbi ágga dasa dáidá maid leat go Guovddášbellodat ii lean maŋimuš áigodagas Sámedikkis, ja nu dárbbašit sii diehttelasat maid vuos háhkat hárjáneami. Sidjiide leat de baicce fállan eará posišuvnnaid, earret eará ožžot sii politihkalaš ráđđeaddiámmáha Sámediggeráđis, man bokte ovttasbargu maid boahtá ovdan.
Dál geahččala Aili Keskitalo goalmmát geardde cegget eanetlogu ja ráđi, ja ulbmil diehttelasat lea ahte galgá beassat ráđđet olles áigodaga, go dan son ii leat vuos beassan vásihit dássážii.
Nu jáhkkimis lea ovttasbargovuohki leamaš dehálaš soabadaladettiin ja ođđa ovttasbargošiehtadusas bohtet ovdan muhtin posišuvnnat, muhto maiddái guđe ládje dáid bellodagaid ja listtuid ovttasbargu ja gulahallan galgá doaibmat.
Dál geahččala Aili Keskitalo goalmmát geardde cegget eanetlogu ja ráđi, ja ulbmil lea ahte galgá beassat ráđđet olles áigodaga, dan son ii leat vuos beassan vásihit.