Deattuhit dehálašvuođa ovttasbargat unnitloguin
Ovttasbargošiehtadusas posišuvdnajoavku deattuha ahte olu áššiin lea sámi servodahkii buorrin jus Sámedikkis lea govda eanetlohku mearrádusas.
Norgga Sámiid Riikkasearvvi, Guovddášbellodaga, Johttisápmelaččaid listu ja Åarjel-saemiej Gïelh ovttasbargošiehtadus vuolláičállui mánnodaga Sámedikkis. Šiehtadus čilge joavkku politihkalaš ovttasbargovuođu, gulahallama ja politihkalaš posišuvnnaid.
– Bellodagat guorrasit oktasaš álginjulggaštussii mii muitala áigodaga politihkalaš profiilla ja vuoruhemiid. Julggaštus ii fátmmas buot áššiid dahje áššesurggiid, muhto muitala politihkalaš geainnu, čuožžu ovttasbargošiehtadusas.
– Stuora eanetlohku sámi servodahkii buorrin
Ovttasbargošiehtadusas loktejit maid dehálašvuođa ovttasbargat eará bellodagaiguin Sámedikkis.
– Olu áššiin lea sámi servodahkii buorrin jus lea stuora eanetlohku Sámedikki mearrádusa duohken. Min ráđđelahtuin, politihkalaš ráđđeaddiin, joavkojođiheddjiin ja áirasiin lea maid geatnegasvuohta gullat ja árvvoštallat cealkámušaid opposišuvdnajoavkkuin Sámedikkis, celko šiehtadusas. Ovttasbargošiehtadusas čállet maid ahte lea vejolaš rahpat joavkočoahkkima áiciide, jus fal muhtun dihto eavttut leat devdon.
Posišuvnnaid válljen
– Politihkalaš posišuvnnat galget juogaduvvot vai nu bures go vejolaččat čuvgehit fápmodili ovttasbarggus. Presideanta vállje njeallje ráđđelahtu, golbma NSR:S ja ovtta JSL:S. Áigodaga gaskkamuttus lonuhuvvo JSL ráđđelahttu ÅASG ráđđelahtuin. – Sámediggepresideanta nammada guokte (golbma) ráđđeaddi, ovtta Guovddášbellodaga evttohusa vuođul, ja ovtta (guokte) NSR evttohusa vuođul. – Guovddášbellodat jođiha posišuvdnajoavkku ealáhuslávdegotti, ja Plána- ja finánsalávdegotti. – Posišuvdnajoavkkus galgá leat sierra proseassa Fefo stivralahtuid nammadeamis. Áinnas opposišuvdnajoavkkuin gulahallat dan barggus. Das lea ulbmil sihkkarastit govda gelbbolašvuođa Sámedikki miellahtuin Fefo-stivrras.
Ásahit siskkáldas ealáhuslávdegotti
Siskkáldasat joavkkus galgá ásahuvvot ealáhuslávdegoddi man Guovddášbellodat jođiha.
Dát lávdegoddi galgá buktit cealkámušaid vuođđoealáhusaid ektui.
– Nannet ovttasbarggu
– Dát politihkalaš ovttasbargu gáibida buori gulahallama politihkalaš áššiin, ja lojalitehta ovttasbarggu posišuvdnajovkui. Čielga gulahallan ja ovddasvástádusjuohku nanne ovttasbarggu. Ferte maid láhččojuvvot nu ahte mii sáhttit oahpásnuvvat. Dás lea buohkain ovddasvástádus nannet ovttasbarggu mas buohkat sáhttit loaktit ja dovdat iežamet oadjebassan, čuožžu ovttasbargošiehtadusas.