Návddaš ruškki hálbbes vugiin
Norsk Friluftsliv lihttu ávžžuha olbmuid fitnat olgun vázzimin iežaset lagas guovllus, guolbanis, meahcis dahje duoddaris, dieđihit sii preassadieđáhusas.
– Ii dárbbaš geavahit bearraša seston ruđaid hávskes lupmui. Čavčča čáppa ruškki sáhttá bures hálbbes vuogi mielde návddašit, rávve Norsk Friluftsliv.
Norsk Friluftsliv lihtu váldočálli Lasse Heimdal lohká ii leat dárbu oastit buot dávviriid buvddas, daid sáhttá láigohit hálbái dahje luoikkahit nuvttá nu ahte čakčaluopmu ii šatta nu divrrasin.
Idjadeapmái sáhttá jus alddis ii leat tealtá, oastit oapmegálvvu Finn dahje Fretex, dahje oastit hálbái go olbmot fáluhit daid hálbái.
– Mánáide lea stuorra mátki jus besset šiljus dahje lagas birrasis teltet. Olu mánáide lea dehálamos ahte besset leat váhnemiid lahka, lohká Heimdal.
Guhkit mátki sáhtášii leat duoddaris dahje kránnjágielddas gohtten moadde beaivvi, dolastit meahcis jus eana ii leat menddo goikkis. Sáhttá maid čavgat guovtti muora gaskii sejelduhka seaŋgan ja das ijastit. Jus ii hálit ijastit olgun, de sáhttá láigohit dahje luoikat bartta oahpes olbmuin dahje láigohit Statskog, Norges Fjellstyresamband dahje Friluftsrådene hálbái dahje nuvttá. Den Norske Turistforeningen (DNT) searvvis lea maid vejolaš láigohit bartta moaddečuođi kruvdnii.
– Jus ii hálit idjadit olgun, de sáhttá oađđit ruovttus ja fitnat iežas lagaš birrasis beaivit. Muitte, ii leat mátkki guhkodat mii mearrida man somá lea, muhto ahte bearaš lea ovttas, deattuha Norsk Friluftsliv lihtu váldočálli Lasse Heimdal.