– Beali eambbo guossit go ledjen vuordán
Prošeaktajođiheaddji, Rdm-guovdageainnu gilišilju museahoavda Johan Aslak Haetta, lea erenoamáš duđavaš go beali eambbo guossit fitne geahččamin dáiddačájáhusa «Dokumentasjonssenter La Elva Leve» Mázes go dan maid lei vuordán.
Guokte vahkku dás ovdalis, čakčamánu 24. beaivvi, rahppui dáiddačájáhus «Dokumentasjonssenter La Elva Leve» Mázes Oves Varesenter gávppis guovdu Máze. Dáiddačájáhus galggai čájehuvvot gitta golggotmánu gávccát beaivái. Ulbmil čájáhusain lei govahallat makkár Máze Duođaštanguovddáš livččii sáhttán leat jus dat ásahuvvošii.
– Livččen lean duđavaš jus 200 olbmo bohtet geahččat dán čájáhusa, muhto dál lea badjel 400 olbmo fitnan dan geahččamin, beali eambbo go ledjen vuordán. Lean hirbmat duđavaš, lohká RDM Guovdageainnu gilišilju museahoavda Johan Aslak Haetta moji.
Son muitala olgoriikalaččat leat fitnan geahččamin dáiddačájáhusa. Maiddái ovddeš miellačájeheaddjit, muhtumat boahtán Oslos Mázii justa dan dihtii.
– Nubbi fas lea ovddeš romsalaš miellačájeheaddji gii šattai guđa geardde politiija gaccaid gaskii go demonstrerii Álttáguovdageainnu dulvadeami vuostá. In lean oppanassii ge jurddašan ovddeš miellačájeheddjiid boahtit deike. Dát čájeha ahte lea dárbu dakkár guovddážii, lohká museahoavda Johan Aslak Haetta.
Dárbu guovddážii
Lea Rdm-guovdageainnu Gilišilju mii prošeavtta bokte lea ná čalmmustahttán earret eará daid olmmošlaš beliid ja eará váikkuhusaid Álttá-guovdageainnu buođu huksemis Čávžžus. Musea lei luoikkahan Mázejoavkku dáidagiid ja dávviriid Álttá Museas ja Riddo-duottar-museain ja priváhta olbmuin. Gilišillju lea jearahan olbmuid geat ain muitet mo lei go 1970-logus go eiseválddit áigo dulvadit Máze, mo mázelaččat dieđihedje, miellačájehemiid Álttá-guovdageainnu dulvadeami vuostá ja nealgudemiid, ja das ráhkadan filmmaid.
– Leamaš stuorra beroštupmi dása. Báikeolbmot leat fitnan beaivválaččat. Máze skuvlamánát ja oahpaheaddjit leat fitnan. Lea duođaid áigi muitalit mii dalle dáhpáhuvai. Ođđa buolvvat eai leat gullan dan birra. Váhnemat leat jurddašan ahte lea nu diehttelas ahte buohkat dan dihtet, ii leat dárbu dan birra muitalit. Muhto ođđa buolvvat han riegádit, eai ge sii leat dainna oahpuin riegádan. Dát lea hirbmat stuorra oassi sámi historjjás ja Sámedikki ásaheamis. Lea dehálaš oažžut dan ovdan, lohká RDM Guovdageainnu gilišilju museahoavda Johan Aslak Haetta.
Rievtti mielde áigo vuordit dáinna čájáhusain, muhto go Máze siidda ásahuvvui Mázejoavkku ovddeš dáiddadállui, de mearridii musea čájehit dán dáiddačájáhusa.