– Muđui šaddet olbmot heaitit boazodoalus
Gáibidit ahte el-fápmolinjá sirdojuvvo:
Statnett jiehtanas linjá sáhttá olbmuid duvdit eret boazodoalloealáhusas. Fiettar orohagas gáibidit ahte el-fápmolinjá sirdojuvvo. DavviRomssa diggegoddi gieđahallá ášši.
Statnett lea huksemin el-fápmolinjá Báhcavuonas Romssas Hámmárfestii Finnmárkui. Jiehtanas linjá lea sullii 300 kilomehtera guhkki ja rasttilda čieža gieldda. Dat mearkkaša ahte el-fápmolinjá váikkuha olu boazodoalloguovlluide Romssas ja Finnmárkkus. Statnett lea nagodan soahpat eanaš orohagain, muhto njeljiin orohagain eai leat boahtán ovttaoaivilvuhtii. Dán ja boahtte vahkkus gieđahallá DavviRomssa diggegoddi ášši.
Duvdiluvvojit eret
Fiettar, Lákkonjárgga, Skárfvákki ja Bassevuovddi orohagat leat čoahkkanan Davvi-romssa diggegoddái bissehan dihtii dálá plánejuvvon el-fápmolinjá man Statnett lea huksemin. El-fápmolinjás eai leat váikkuhusat buot Fiettar orohaga siidaossosiidda, muhto oassi sáhttá massit guotteteatnamiid.
– Min orohagas leat golbma dálvesiidda, ja dain leat guotteteatnamat iešguđetge sajiin. El-fápmolinjjás leat issoras stuora váikkuhusat dan siidii mas lea guotteteana Skáiddaduoddaris, ja go goalmmát siida boahtá Skáiddaduoddarii geassit, de dieđusge váikkuha linjá dasa maid. Bohccot duvdiluvvojit eret orohagas, nu ahte mii njulgestaga massit eatnamiid gos galggašeimmet siiddastallat ja guotteteana váldojuvvo eret, čilge Fiettara advokáhta Nils Mikkelsen Utsi.
Šaddet heaitit
Utsi lea maiddái boazodoalli Fiettaris ja dadjá iežaset gáibidit ahte jiehtanas linjá sirdojuvvo eret sin guottetbáikkiin.
– Mis lea hui lunddolaš gáibádus, ja dat lea ahte linjá sirdojuvvo orohat olgguldas ráji mielde. Dat iešalddis duvddášii ealu ruovttoluotta oarjjás, iige Kárášjoga johtingeidnui, lohká son. Jus Fiettar orohat ii lihkostuva dikkis, de ballá advokáhta ahte muhtimat šaddet guođđit boazodoalloealáhusa.
– Dat lea dieđusge čielga ballu ja duohtavuohta, dat lea ahte olbmot šaddet heaitit boazodoalus, lohká Utsi.
Sávvá boazodoalus boahtte áiggi
Vaikke Statnett ii leat nagodan soahpat buot beliiguin ja ášši dál lea diggevuogádagas, de joatkašuvvá el-fápmolinjá huksen.
– Mu mielas lea ártegis bargovuohki go huksegohtet el-fápmolinjjá ovdal go buot lobit leat čielgan. Dat iešalddis čájeha Statnett bargovugiid, lohká advokáhta Nils Mikkelsen Utsi. Son čilge ahte eai sáhttán soahpat Statnettain go eai háliit iežaset hávddi goaivut, dál sávvet vuoitit diggeášši.
– Mun dieđusge sávan ahte doppe lea ain boazodoalus boahtte áigi, dat lea min sávvamuš, lohká son.
Lobálaš bargu
Statnett čuoččuha ahte sis lea lohpi čađahit huksemiid maŋŋel go Oljo- ja energiijadepartemeanta lea addán konsešuvnna ja Norgga čázádat- ja energiijadirektoráhtta lea dohkkehan buot ráhkadusbirasplánaid.
– Statnett oaivvilda ahte doaibmalohpi lea ollislaš ja ahte ráhkadusplána vuhtiiváldá boazodoalu, go sin váidagat eai leat vuhtiiváldojuvvon. Dat mielddisbuktá ahte huksenbargu sáhttá joatkašuvvat. Jus Statnett galggašii bissehit doaimmas diggeášši geažil de sihke maŋŋona ja divru el-fápmolinjá. Mii gártat jo guhkit áigodagaid bissehit bargguid sihke giđđat, geasset ja čakčat vai vuhtiiváldit boazodoalu, čilge Statnett davvi regiovnna gulahallanhoavda Berit Erdal.