Dárbu karriearabagadallamii Finnmárkkus
Jagi maŋŋá go álggahuvvui doaibma Karriere Finnmark, gii ovtta jagis lea bagadallan 250 finnmárkulačča. Prošeaktajođiheaddji Susanne Lupton lohká leamaš dárbu dán fálaldahkii.
Vuosttaš jagis lea Karriere Finnmark čađahan 600 bagadallandiimmu 250 olbmuid. Prošeaktajođiheaddji Susanne Lupton Finnmárkku fylkkagielddas lea issoras duhtavaš maŋŋá dan vuosttaš jagi maid prošeakta lea doaibman.
Veahkeha dahkat dehálaš mearrádusaid
– Mis lea dat illu go leat beassan veahkehit 250 olbmo dán jagis, ja sii leat dohppen iežaset bargodilálašvuođa. Muhtimat leat aitto geargan joatkkaskuvllas, muhtimat leat ožžon rávvaga NAV:S ja eatnašat leat ollesolbmot geat háliidit geahččalit eará geainnuid bargoeallimis, dadjá Lupton.
Gávpogiin Finnmárkkus
Karriearaguovddážis leat kantuvr- rat Čáhcesullos ja Álttás, muhto sis leat maiddái fásta kantuvrabeaivvit juohke nuppi vahku Hámmárfeasttas ja Girkonjárggas. Karriearabagadallit galledit maiddái eará sajiid fylkkas, jus ožžot jearaldaga.
Lassána dárbu
– Mii veahkehit olbmuid geahčadit sin beroštumiid ja resurssaid, ja mii fállat profeššunealla ságastallanguoimmi geas lea karriearagealbu, fidnoválljen ja beroštupmi bargomárkanis. Dárbu dása lea lassánan sakka, go bargomárkan ja gealbogáibádus lea álohii rievdamin, dadjá son ja lasiha:
– Dat ii leat šat nu ahte olmmoš lea seamma barggus 20 jagi. Fidnoeallimis lea máŋgasiin dárbu ođđa gelbbolašvuhtii ja lonuhit barggu, das mii maid sáhttit fállat bagadallama, lohká son.
Sávašii dát šaddá bistevašfálaldahkan
Prošeakta Karriere Finnmark lea ovttasbargu gaskal fylkkagieldda ja NAV Finnmárkku. Eará fylkkain Norggas leat dál bistevaš karriearaguovddážat, ja boahtte jagi galgá Finnmárkku fylka mearridit galgá go Karriere Finnmark šaddat okta bistevaš fálaldahkan fylkkaássiide.
– Karriearabagadalliin Finnmárkkus leat gaskamearálaččat seammá ollu oahpahusdiimmut go eará karriearaguovddážiin reasta riikkas, vaikke mis ii leat nu alla olmmošlohku. Lea čielga dárbu karriearabagadallamii Finnmárkkus, dadjá Karriere Finnmark prošeaktajođiheaddji Susanne Lupton.
silje@avvir.no