Álttá sámi giellaguovddáš fárren
Go Álttá suohkan mearridii viiddidit sámi mánáidgárddi, fertii Álttá sámi giellaguovddáš gávdnat eará vistti alcces. Ii mannan guhká, ja dál leat juo gergosat fárret.
Miessemánus čielggai Álttá suohkanis ahte áigot viiddidit sámi mánáidgárddi, ja lasihit njealját ossodaga Álttá siidii. Dat mearkkaša ahte Álttá siiddas ii leat šat sadji Álttá sámi giellaguovddážii. Dalle álggii proseassa gávdnat ođđa vistti. Dál, measta jahkebeali maŋŋel, leat juo fárren.
Buorre čoavddus
Vaikko Álttá sámi giellaguovddáža beaivválašjođiheaddji, Ann-merete Solbakken, mielas lea suddu fárret eret Álttá siiddas, de lea son aŋkke duhtavaš čovdosiin go láigohišgohtet allaskuvllas lanjaid.
– Mu mielas lea hui buorre go Álttá suohkan vuoruha sámi mánáidgárddi, ja áigot láhččit dili eambbo sámi mánáide lassi mánáidgárdesajiiguin, dadjá son.
Solbakken muitala ahte doppe sis lea semináralatnja, guokte kantuvrra ja rádju.
– Lea veahá gáržžit go Álttá siiddas, muhto buorre ahte mis leat kantuvrrat.
Olu vejolašvuođat
Go giellaguovddáš ohcagođii ođđa vistti, bohte olu fálaldagat. Ledje doarvái fálaldagat ahte besse ieža válljedit daid gaska. – Álttás lea hui divrras láigohit, nu ahte midjiide lei dehálaš ahte ii leat nu mearehis divrras, muitala Solbakken. Giellaguovddáš ii fárre nu guhkás eret iežaset ovddeš visttis. Vázzilit beare vulos luohká, de leat iežaset ođđa kantuvrrain.
Oanehisáiggi orodit eará sajis
Man guhká giellaguovddáš galgá leat doppe gos dál lea, lea vuos eahpečielggas.
– Álttá suohkan lea mearran doalahit njeallje ossodaga sámi mánáidgárddis 2019 rádjái. Dan rájes eat dieđe šat movt de šaddá. Dál álggos leat láigohan min ođđa kantuvrraid vuos dušše jahkái. Šiehttat guhkidit láiggu jus lea dárbu. Dál eat dieđe vel man guhká dat liige ossodat lea, ja beassat go ruovttoluotta, loahpaha Álttá sámi giellaguovddáža beaivválašjođiheaddji, Ann-merete Solbakken.