Bohciidahtii mánnávuođa bahča muittuid
Bálkášuvvon Sameblod-filbma (Saamelaisveri - Sámevárra) lea jorran dál maŋemuš vahkuid maiddái davimus Sámi filbmateáhteriin Suoma bealde, čállá Yle Sápmi. Olbmuin leamašan vuordámušat, dasgo filmma birra lea hállojuvvon olu ja viidát. Eanodagas filmma vuosttašeahket lei mannan bearjadaga. Eandalii ge vuorrasut sápmelaččaide Sameblod bohciidahtii bahča muittuid mánnávuođas. 75-jahkásaš heahttálaš Gáijjot-ántte-ánne, Anni Näkkäläjärvi ii álggos diehtán, duostá go oba geahččat ge filmma.
– Álggos bođii jur bivastat, orui nu roattus, ahte in dieđe mii das boahtá duon filmmas, duostá go dan oba geahččat ge. Danne dat bođii ge nu bivastat, muitala Anni Näkkäläjärvi.
Sameblod muitala sápmelaččaid soardimis 1930-logus. Nuorra sámenieida Elle Márjá mearrida luohpat iežas sápmelaš identitehtas, go son fárre Ruoŧa Uppsalai, gos dahke nállebiologalaš dutkamušaid. Filmmas čájehit mo sápmelaččaid mihtidedje ja nuolahedje. Anni Näkkäläjärvi lea ieš vásihan dan mánnán skuvllas.
– Gal mis ledje juste seammalágan dovddut go dan nieiddaguoktás filmmas. Gal dat doaktárhommát ledje issorasat, ii han dohko duosttan olu mannat ge, go dat gehčče, nulle ja mihtidedje ja govvidedje vel. Gal han mii leimmet seammaláganat go dien filmmas, geahčaimet jorbačalmmiiguin go eat ipmir maid galgá, muitala Anni Näkkäläjärvi.
Son lohká lea buorre go nuorat buolva oaidná mo leamašan ja manne olusat leat čiehkan iežaset sámevuođa eallinagi.