– Mihttu lea medálja, ja áinnas golli
20-jahkásaš ja 60 kilo, dan eai eanas nissonolbmot muital iežas birra, muhto Gunn Rita Boine lea 20-jahkásaš ja galgá gilvalit heaibumis 60-kilosaččaid luohkás.
Golli maŋis
Boine lea ráhkkaneame vuolgit go Ávvir riŋge sutnje disdaga. Ii sus leat nu buorre áigi, go bearjadaga son galgá juo fággái vuostálastin.
– Na mun ferten mieđihit ahte in leat gal turistan vuolgán Durkii. Mun dovddan mus lea buorre vejolašvuohta medállja váldit, ja mihttu lea diehttelasat golli, muitala son Ávvirii.
Silba nieida
Boine ii leat leamaš gal makkárge turista ovdal ge heaibunmátkkiin. Sus lea silbamedálja Eurohpámeasttirgilvvus 2014:s, nuorabuččaid luohkás, ja jagi maŋŋel son vuittii bronsamedálja junioraidluohkás.
Deatnulaš nieida lea jođus Máilmmimeašttirgilvvuide heaibumis, mii lágiduvvo Durkkas. Son ii loga iežas gal vuolgán turistan dohko, son lea alla árvosaš ruovddi maŋis, ja áinnas golli.
Sáddos heaibut
Boine galgá ge dál searvat dan heaibunvuohkái mas son lea bures birgen, namalassii sáttoheaibumis.
– Dat mearkkaša ahte mii heaibut sáddo alde. Dat sáhttá mielddisbuktit ahte ii leat nu buorre coakci juolgái go lea sáddos, ja dat sáhttá dieđus dagahit ahte njalkkihat dahje juo duolmmastat gohppái. Muhto mun lean birgen bures ovdal sáddos heaibut, ja sávan lihkostuvan bures, lohká son.
Unnán dieđut
Vaikke Boine lohká ahte sáttoheaibun lea álgán šaddat eambbo ja eambbo miellagiddevažžan dábálaš heaibuid gaskkas, de goitge eai leat sus nu olu dieđut heai- bumiid birra, vaikke lea olles Májilmmimeasttirgilvu.
– Mun in dieđe geat dohko bohtet, ja in dieđe gean vuostá galggan álggos gilvalit. Dieđán dušše ahte dábálaččat bistá okta vuorru 3 minuhta, muitala son vel Ávvirii loahpas gilvvu birra.