Deanu sátnejođiheaddji: – Roassu jus reabbábivdu rahppo Oarje-finnmárkui
Deanu sátnejođiheaddji Frank Ingilae reagere garrasit go direktoráhtta evttoha rahpat gonagasreabbábivddu Oarje-finnmárkku biviide.
Guolástandirektoráhtta lea golggotmánu 4. beaivvi šadden sádden gulaskuddamii evttohusaid mot rievdadit boahtte jagi gonagasreabbábivddu. Leat muhtin mearkkašahtti rievdadusat maid Guolástandirektoráhtta lea evttohan, okta dain lea rahpat gonagasreabbábivddu Oarje-finnmárkku bivdiide.
Roassu Nuortafinnmárkku bivdiide
Deanu sátnejođiheaddji reagere garrasit go direktoráhtta evttoha rahpat gonagasreabbábivddu Oarje-finnmárkku bivdiide. Deanu ovdagoddi lea ge dál sádden gulaskuddancealkámuša Guolástusdirektoráhttii.
– Lea roassu Nuorta-finnmárkku bivdiide go rahppo bivdu nu olu eará bivdiide dan seamma gonagasreabbábivdoeari guovllus. Go earit eai leat lasihuvvon, de mearkkaša dušše ahte Nuortafinnmárkku bivdit gártet bivdit unnit gonagasreappá. Dat lea issoras heajos evttohus ja mii reageret garrasit, dadjá Frank Ingilae.
Garrasit čuohcá
Direktoráhtta lea maiddái evttohan lonuhangáibádusa gonagasreappá eari rievdaduvvot 100 000 ruvnnos 200 000 ruvdnui, masa Ingilae ii leat mielas. Dat mearkkaša ahte gonagasreabbábivdit fertejit bivdit 200 000 ruvnno ovddas eará guliid ja reappáid ovdal go besset bivdit gonagasreappáid. Dán vároha maiddái Deanu sátnejođiheaddji garrasit čuohcat Nuorta-finnmárku bivdiide.
– Čuohcá erenomážit sidjiide geat orrot siskelis Nuorta-finnmárkku vuonain ja leat erenomážit mearrasámi guovllut maidda dat čuohcá eanemusat, go leat guolásteaddjit geain lea sin váldotienas gonagasreabbábivddus ja balan sin massimis sin tietnasa jus menddo olu rievdadit lonuhangáibádusa eará bivddus, lohká son.
Gillájit gonagasreappáin
Guolástandirektoráhta áššemeannudeaddji Guro Gjelsvik lohká leat Stuorradikki mii lea dáhtton direktoráhta meannudit ahte olles Finnmárkku bivdit galget beassat bivdit gonagasreappáid.
– Departemeanta lea ožžon dieđuid ahte Oarje-finnmárkkus bivdit maid gillájit gonagasreappáin ja gonagasreabbá bilida árbevirolaš guolástanguovlluid, dadjá Guro Gjelsvik.
Direktoráhta evttohasat
Dálá njuolggadusaid mielde lea lohpi bivdit gonagasreabbái Nuorta-finnmárkkus oarjjás gitta Davvenjárgga rádjái, ja muđui sáhttet Porsáŋggu ja Muosáid bivdit oassálastit bivddus.
Bivdu giddejuvvo bivdoáigodagas cuoŋománu álggus gitta cuoŋománu lohppii. Direktoráhtta čujuha digaštallamii dialogačoahkkimis Čáhcesullos. Evttohus ovddiduvvui suddjen dihtii reappáid mat leat molsumin olggoža, ja maiddái sihkkarastin dihtii ahte reappáin leat buorre kvalitehta maid vuvdet. Gulaskuddanáigemearri lea biddjon skábmamánu 15. beaivvi.