Suohkanat berrejit buorebut ráhkkanit dálvái
Sihke Kárášjoga gielda ja Guovdageainnu suohkan eai leat čállán kontrávttaid muohtačorgejeddjiiguin vaikke leat juo skábmamánus. Dat lea dieđus hui ártet go áiggemunis eai šiehta mášineaiggádiiguin muohtačorgenbargguid. Mánnodat iđida lihkke kárášjohkalaččat olles dálvái go ijas bijai ollu muohttaga. Geainnut ledje ge hejot čorgejuvvon, nu ahte jođánit šadde čiekŋalis rokkit go biillaiguin vuddje luottaid mielde main lei ođđa vahca.
Dákkár dilli go ii leat fástašiehtadus muohtačorgejeddjiiguin dagaha jáhkkimis liigegoluid suohkaniidda, go de han šaddet dušše bivdit summán mášineaiggádiid álgit čorget muohttagiid eret luottain. Dan dieđus mášineaiggádat dahket diibmobálkkáid mielde, eai ge fásta hattiin. Dasa lassin dáidá suohkan šaddat máŋggain luottain heavvalastit eret čiekŋalis rokkiid mat leat šaddan. Dat maiddái dieđus lea liigegollun smávva suohkanii mas lea juo heajos ruhtadilli.
Lea oainnát jáhkkimis ahte muohtačorgenšiehtadusaid haga šaddá gildii divraseabbo.
Ieš alddis eai dáidán heajos čorgejuvvon luottat dagahan makkár ge stuorat bárttiid, nu ahte dan dáfus lea mannan bures. Muhto das aŋkke lea gažaldat ahte man ollu divraseabbon šaddá dát suohkaniidda main ii leat fástašiehtadus muohtačorgejeddjiiguin. Lea oainnát jáhkkimis ahte muohtačorgenšiehtadusaid haga šaddá gildii divraseabbo. Jus dan ii livččii, de han livččii dárbu fástašiehtadusaid dahkat.
Kárášjoga gielda čilge maŋŋoneapmái siva go Finnut Consult AS lea dán jagi ráhkadan Kárášjoga gieldda ovddas fálaldatdokumeantta, ja bargá dainna muohtačorgen proseassain. Muhto maŋŋebárgga ledje ain viežžame fálaldagaid mášineaiggádiin. Dat dieđus mearkkaša ahte mannet vuos muhtun vahkkut ovdal gielddas leat fástamuohtačorgejeaddjit. Dasto dieđuš šaddá muohtačorgen dás ovddas guvlui nuo ja ná, ja gielda maid šaddá bálkáhit muohttagiid čorget dađis go borgá.
Dát dieđus čájeha ahte suohkanat dáppe davvi guovlluin fertejit álgit ráhkkanit buorebut dálvái, ii ge vuordit dassái dálvá ovdal álget ohcat fásta muohtačorgejeddjiid. Dat ii dáidde leat gánnihahtti, ja maiddái lea heajos fáladat gielddaássiide. Dás ii dáidde ge dán skápma eará vejolašvuohta go sávvat ahte fierttut bistet muhtun vahkkuid vai ii šatta issoras divrras muohtačorgen suohkaniidda main ii leat fástakontrákta muohtačorgejeddjiiguin. Das dieđus maiddái lea ságas olbmuid sihkkarvuođa birra, go dan ferte álot vuordit ahte ambulánssat ja buollinčáskadeaddjit gostet gielddageainnuid mielde.