Čájehii Mari Boines govaid maid lea govven golmma jagis
25 kárášjohkalačča bohte girjerádjosii gullat govvejeaddji ja girječálli Susanne Haetta muitaleamen su ovttasbarggu birra sámi dehálamos jienain, Mari Boiniin.
Govvejeaddji Susanne Haetta lea čuvvon ja govven sámi artistta Mari Boine golbma jagi. Tråante 2017 doaluid oktavuođas guovvamánus almmuhii Haetta iežas govvagirji «Mari liibbat / Mari moments». Mannan maŋŋebárgga finai son Kárášjoga girjerádjosis čájeheamen čuovgagovaid ja muitaleamen dán govvenbarggu birra ja su ovttasbarggu Mari Boiniin.
– Susanne Haetta logai go álggii, ahte Mari Boine lea okta dehálaš sámi jietna. Mun logašin son lea dehálamos sámi jienain go son olaha guhkás ja sus lea nu buorre sisdoallu maid son gaskkusta midjiide, čilge kárášjohkalaš Asta Balto manin son lea boahtán ja čuoččasta vuordit govvagirjji oastinvuoru.
Susanne Haetta muitalii maŋŋá ahte son ii lean vuordán ahte 25 olbmo bohtet su gullat Kárášjogas. Lohká iežas hirpmástuvvan go dan ii lean vuordán.
Váikkuhan positiivvalaččat
Sámi artista Mari Boine leamaš maŋimuš 30 jagi Sámi dehálamos jietna. Iežas musihkain lea son juksan miehtá máilmmi.
– Mari Boine lea sámi geahčastagas nu alla dássi dasa maid son áigu muitalit ja muittuhit midjiide. Mu mielas lea olu dáhpáhuvvan das rájes go Mari Boine lávlugođii. Oppanassii dat dáiddalaš bargu mii lea leamašan sámi servodagas ja maid servodat lea buvttadan, ja mas Mari Boine leamaš njunnošis. Son lea hui olu mearkkašan dasa ahte hukset dakkár positiivva gova maiddái ahte mis lea juoga maid addit servodahkii, eat dušše nágge, mii leat buktimin juoidá maid, lohká Asta Balto.
Ovdagovva Mari
Susanne Haetta lea čuvvon Mari Boine govvaapparáhtain lagabui golbma jagi árgabeaivvi rájes, meahcásteamis, Cd-skearruid buvttadeamis gitta konsearttaide sis- ja olgoriikkas. Boađus lea govvagirji mas leat teavsttat sáme- ja eŋgelasgillii. Girji ii livčče menestuvvan jus eaba livčče lean ovttaoaivilis ahte girji galgá ollašuvvat goas nu.
– Girji fertii leat sámegillii, ja go buot sápmelaččat eai máhte dárogiela, de lei buoret dan almmuhit velá eŋgelasgillii, čilge Susanne Haetta.
Ságastaladettiin Kirsi Palttoin, čilge Susanne ahte son lea várra fitnan 40 geardde Mari Boine konsearttain. Girječálli muitala son guldališgođii Mari Boine musihka nuorran ja nu šattai ge Mari su ovdagovva. Lohká Mari Boine bokte son dádjadii fas sámevuhtii go mánnán ii háliidan leat sápmelažžan Álttás.
Luohttevašvuohta dehálaš
Haetta lohká dát ovttasbargu lihkostuvai go guktot aniiga nuppi alla árvvus. Dat lei dehálaš Haettai, erenoamážit go son jearai oažžu go searvat Mari Boine eallimii.
– Muhto son lea profešunealla artista sihke lávddis ja muđui. In muitte mu gieldán goassege, muhto ledje gal várrugas ahte in duolmmas sahtedohko. Mari ii ráddjen govaid, baicce lea háliidan vissis govaid, joatká Susanne Haetta.
Son deattuha ahte lea dehálaš ahte nubbi luohttá sutnje, ahte ii muital buot maid gullá, ii ge rihkko dan olbmo rájáid.
Muitala ságastaladettiin girjerádjosa láidesteddjiin Kirsi Palttoin ahte son lea ožžon veaháš ruhtadoarjaga Mátta-trøndelága fylkkagielddas ja prentendoarjaga Norgga beale Sámedikkis, muđui ii livčče suitán bargat dáinna girjjiin. Susanne Haetta lea maid čállán báŋkorievvára Sven-eirik Utsi eallima birra. Boahtte girji lea govvadáiddára Synnøve Persena birra, ja girji lea boađi boađi.