Áigu mearridit Ruoŧa boazosápmelaččaide boazologuid
Norgga eanandoallo- ja biebmoministtar Jon Georg Dale áigu ásahit lága mainna sáhttet mearridit man ollu bohccuiguin Ruoŧa beale boazosápmelaččat besset johtit Norgii.
Norgga eanandoallo- ja biebmoministtar Jon Georg Dale áigu ásahit lága mainna sáhttet mearridit man ollu bohccuiguin Ruoŧa beale boazosápmelaččat besset johttit Norgii.
Eanandoalloministtar čilge vuođđun go áigot ásahit dákkár ráddjemiid Ruoŧa beale boazosámiide lea dan dihte, go ii leat doaibmi boazoguohtonkonvenšuvdna fámus, ja dasa lassin fertejit vuoruhit ekologalaš ceavzilis boazodoalu.
– Go ii leat doaibmi boazodoallokonvenšuvdna, ja ekologalaš bissovaš ja nanu boazodoalu, de bargagoađán dál ásahit láhkavuođu mii mudde man olu Ruoŧa beallái gullevaš bohccot sáhttet leat Norgga beale guohtoneatnamiid alde, dadjá Jon Georg Dale preassadieđáhusas.
Seamma go Norggas
Dale čujuha dasa ahte Norgga beale boazodoalus leat juo mearridan boazologuid iešguđet orohagaide guohtumiid ektui. Seamma vuogi mielde áigot maiddái Ruoŧa beale boazosámiide mearridit, ahte man stuorra ealuide leat guohtumat Norgga bealde. Ruoŧa bealde eai leat ge boazologut mearriduvvon.
– Dát mudden galgá dahkkot guohtonekologalaš nanu ja bissovaš árvvoštallamiid ektui, seamma vuogi mielde go mii muddet Norgga beale boazodoalu. Dáinna lágiin meannuduvvo Ruoŧa beale boazodoallu seamma vugiid mielde go Norgga beale boazodoallu das mii guoská man ollu bohccot sáhttet lea dihto guohtumiid alde áiggis áigái, lohká eanandoallo- ja biebmoministtar Jon Georg Dale.
Geatnegasvuohta ovddeš konvenšuvdnii
Lagabuidda 20 jagi leat juo bargan oččodit ođđa konvenšuvnna mii guoská rádjerasttildeaddji boazodollui Norgga ja Ruoŧa gaskka, muhto eai leat vel nákcen čoavdit ášši. Mannan geasi dovddahuvvui Ruoŧa bealde ahte sii eai sáhte ratifiseret ođđa konvenšuvdnaevttohusa, mii lea gárvvistuvvon juo 2009:s, ja man Norga lea dohkkehan ja čađahan.
– Go ii leat šihttojuvvon Ruoŧa ja Norgga ođđa konvenšuvdna, de lea dat dagahan hástaleaddji dili Norgga beale boazodollui, dadjá Jon Georg Dale ja lasiha:
– Norga hálddaša ain geatnegasvuođaidis ovddeš konvenšuvnna ektui. Dat dagaha dan ahte Norgga beale boazodoalus leat unnán vejolašvuođat atnit dálveguohtoneatnamiid Ruoŧa bealde. Ruoŧa bohccot, mat guhtot Norgga bealde, leat maid lassánan máŋggaid jagiid čađa, ja dahkan earenoamáš váttes dilálašvuođaid daid seamma guovlluid Norgga beale boazodollui.
Gierdameahttun dilli
Norgga bealde leat čađahan stuorit reguleremiid oažžun dihte boazologu mii lea ekologalaččat nanus ja bissovaš ja mii lea guohtumiid ektui.
– Lea gierdameahttun Norgga boazoeaiggádiidda dat ahte seammás go ieža čađahit buoridandoaimmaid, de johtet Ruoŧabeale ealut seamma guohtuneatnamiidda ja nu ii leat geahčču das man olu bohccot leat dain seamma guohtoneatnamiin, dadjá Dale.
Unnán jáhkku ođđa soabadallamii
Ruoŧa bealde leat ovddidan sávaldaga fas loktet ovdan šiehtadallamiid ja nu geahččalit oččodit čovdosiid áššái.
– Norgga bealde leat háliidan, ja ain háliidit, oččodit áigái ođđa konvenšuvnna Ruoŧa ja Norgga gaskii. Mii leat juo guhkit áigge leamašan gárvásat dohkkehit ođđa konvenšuvnna evttohusa. Muhto daid vásáhusaid vuođul maiddái leat ožžon hirbmat hástaleaddji proseassaid mat leat leamašan áššis, de mu mielas lea unnán jáhkehahtti ahte ođđa soabadallamat buvttáše makkárge čielggademiid mat dagahivčče ahte sáhtálii ođđa konvenšuvnna oažžut johtui. Dat lea juo šihttojuvvon ođđa šiehtadus mii berre leat buorre vuođđun ratifiseret boazodoallokonvenšuvnna, dadjá eanandoallo- ja biebmoministtar Jon Georg Dale.
Eai ođđasit šiehtat
– Danne eat oainne Norgga bealde áigeguovdilin álggahit ođđa šiehtadallamiid. Norgga bealis áigut loahpahit ášši, ja nu váldit vuhtii dan ahte čađahuvvon proseassaid bokte eai leat nákcen olahit čovdosiid áššái. Dan lean maid dieđihan báikegoddeminis-
tarii Sven-erik Buchtii, lohká Jon Georg Dale.
Ášši duogášdieđut
Maŋemus rádjerasttildeaddji boazodoallokonvenšuvdna gaskal Norgga ja Ruoŧa (1972 boazodoalokonvenšuvdna) heittii doaibmamis 2005:s maŋŋel go Ruoŧa eise- válddit biehttaledje dohkkeheames Norgga evttohusa guhkidit konvenšuvnna vel golmmain jagiin. 2009 Guovvamánus almmuhuvvui ođđa konvenšuvdnaevttohus, man ovddasvástideaddji ministarat vuolláičálle golggotmánus seamma jagi.
Dan rájes leat bargan oččodit rati- fiseret ja váldit atnui ođđa konvenšuvnna, nu ahte fas ožžot doaibmi konvenšuvnna dan guovtti riika gaskii.