– Eat leat dušše turisttagálvu
Thon hotealla diŋgonhoavda ii háliidivčče ahte Guovdageaidnu galgá šaddat dušše dakkárin mii fállá eará mátkkoštanealáhusfitnodagaide dan maid dat eai nagot fállat. – Guovdageainnus lea visot nu go lea, ii ge leat ceggejuvvon turisttaid várás, nu galggašeimmet gal ieža nagodit márkanfievrridit dan, ja váruhit eat vuoittáhala, lohká son.
Anni Ravna Triumf lea Guovdageainnu Thon hotealla diŋgonhoavda. Son gal lea mielas ovttasbargui jus dat buktigoahtá eambbo turisttaid Guovdageidnui. Son goitge lohká galgat váruhussan ahte jus Guovdageaidnu galgá dušše leat báiki gosa earát buktet turisttaid.
– Mii fertet ieža gal dan oasi bargat, go dušše lea dakkár báiki man earát čájehit iežaset kundariidda, de das ii báze deike mihkkege, lohká son.
– Mii fertet čájehit ahte Guovdageaidnu lea duohtavuohta, ii ge dušše turistagálvu mii lea ceggejuvvon sin dihte, lohká son.
Ieža ovddidit iežamet
Triumf ii ge leat nu mielas Guovdageainnu dáfus ahte jus eará mátkkoštanfitnodagat vuvdet vásáhuspáhkaid, de dain páhkain leat Guovdageainnu vásáhusat oassin.
– Mii fertet ieža nagodit daid páhkaid vuovdit. Balan jus earát dahket dan, de ii báze nu olu ruhta das Guovdageidnui, lohká son.
Vejolašvuohta
Triumf goitge lea mielas olbmuid oažžut Guovdageidnui.
– Iešalddis hal dat lea buorre go guossit bohtet Guovdageidnui, go dat sáhtášii maid buktit vejolašvuođaid olbmuide dáppe fállagoahtit maid dakkár smávit fálaldagaid maid lea álki bargat nu go turistabusset go dat bohtet, dain lea unnán Guovdageainnus maid sáhttet bargat. Dakko bokte soaittášii muhtun nagodit fállagoahtit unnit ja jođánis fálaldagaid, lohká son.
Váruhus
Guovdageainnu Thon Hotealla hoavda, Knut Vidar Alseth, lohká ahte sidjiide lea boahtán várrehus ahte eai galgga viggat dakkár márkanii mas lea turistaeatnatvuohta.
– Min leat ávžžuhan iežamet bargat baicca, go mis lea dat duohtavuohta dáppe maid turisttat dál ohcalit. Mii eat ábut viggat daidda márkaniidda main turistaeatnatvuohta lea, go de lea bahá ahte min fálaldagat jávket dohko, lohká son.
Ballet mis
Alseth maid muitala sin ovttasbargan Biebmu prošeavtta oktavuođas Suoma mátkkoštanealáhusaiguin.
– Doppe lean ožžon dan ipmárdusa ahte sii ballet min duohtabuktagiin dego jápmimis. Ieža eai fála duohta sámevuođa, ja dihtet mis lea dat, beare mii bargat veahá dainna vai šaddá dovddusin.
– Eat ábut njuiket vaikke masa dainna oskkuin ahte dál galgat dinet stuora ruđaid, mii fertet suddjet iežamet erenoamášvuođa dáppe Guovdageainnus ja ieža fállat dan nu go mii diehtit lea riekta daid fállat, lohká son vel.
nilsjohan@avvir.no