– Riekta Norggas gozihit Ruoŧa boazologu
Boazosápmelačča mielas lea rehálaš ja riekta ahte Ruoŧa beale boazosápmelaččat galget maid čuovvot Norgga hálddašeami, ja čujuha lappekodisilla.
Stállonjárga orohaga nubbijođiheaddji Per Mahtis Oskal lohká ahte nu mo dán rádjai leat ođđa rádjakonvenšuvnna evttohan, de lea dat dušše váttisvuohtan Norgga orohagaide.
– Jus galgá čuovvot lappekodisilla, de ferte maid čuovvut dan mii čuožžu das, ahte galgá nuppi riikka njuolggadusaid čuovvut. Dat mearkkaša ahte Ruoŧa boazosápmelaččat šaddet seamma hálddašeami vuollái dan botta go lea Norgga bealde. Lean vuordán guhká ahte eiseválddit hálddašišgohtet guovllu gos leamašan konvenšuvdna. Dán rádjái ii leamašan hálddašeapmi ja dat lea dagahan stuorra váttisvuođa Norgga orohagaide, dadjá boazosápmelaš Per Mathis Oskal.
Su mielas lea riekta ahte Norgga stáhta bearráigeahččá Ruoŧa beale boazologu čearuin mat geavahit Norgga beale guohtuneatnamiid.
–In imaš veaháš ge go Norgga geahčada vejolašvuođaid. Mu mielas lea vuoiggalaš ja riekta gozihit boazologu, lohká Oskal.
Ii vuođđu kommenteret boazologu
Norggas lea almmolaš boazolohkan ja mearriduvvon bajimuš boazolohku orohagain, lassin lea maid mearriduvvon galle siidaoasi sáhttet leat ovtta orohagas.
– Ruoŧa čearut čađahit ieža boazolohkama, eai leat eiseválddit mat čađahit lohkama eai ge dárkkis boazologu Ruoŧas. Lea váttis diehtit lea go Ruoŧa boazolohku lassánan vai geahpeduvvon, ii ge mus leat vuođđu dan kommenteret, lohká Per Mathis Oskal. Son lasiha ahte buriid jagiin oaidná dieđusge ahte leat eambbo bohccot ja jus leat heajos jagit leamašan, de njiedjá vea- há Ruoŧa beale bohccuid lohku mat guhtot Norggas.
Heajos evttohus
Per Mathis Oskal ii loga eiseválddiid dahje Sámedikki evttohasa buorrin ollu orohagaide.
– Mu mielas leat guktot evttohusat heajos evttohusat. Min orohatdilli ii buorrán, go evttohusa vuođul mii leat massán eanaš dálveeatnamiid Norgga bealde. Midjiide leat fállon eatnamat Ruoŧas, muhto váttisvuohta eatnamiin lea go leat vuovdečearut ja konsešuvdnačearut mat leat das birra jagi. Eai leat guorus eatnamat ja dieđusge dat mielddisbuktá stuorra váttisvuođaid, loahpaha son.
inga@avvir.no