Sámediggi lea liibba atnán unnidit doarjaga teáhterii
Go Sámi Našunálateáhter lea ožžon 1,2 miljovnna jahkásašdoarjjan DavviNorgga kulturšiehtadusas boahttevaš njealji jagi, dan atná dál sámediggeráđđi ággan beassat unnidit doarjaga sidjiide.
Sámi Našunálateáhter - Beaivváš, lea buori barggu dahkan go leat nagodan humahit iežaset Davvi Norgga kulturšiehtadussii mielde,
gos sidjiide boahtá dál 1,2 miljovnna ruvnno jahkásašdoarjja boahtte njeallje jagi. Dat mielddisbuktá ahte sii besset eambbo teáhterčájáhusaid čájehit álbmogii. Dasa lassin leat sii Sámedikki fástadoarjjaortnega bokte ožžon badjelaš 21 miljovnna ruvnno jahkásaččat.
Liibba atnit unnidit doarjaga
Dál lea Sámediggi 2018 bušeahttaevttohusas atnán liibba unnidit doarjaga teáhterii, dainna ákkain go sii leat beassan mielde DavviNorgga kulturšiehtadusortnegii ja ožžot 1,2 miljovnna jahkásaččat. Sii čállet bušeahttačállosis ná: «2018-2021 áigodaga davvi-norgalaš kulturšiehtadusas lea Beaivváš
Sámi Našunálateáhter váldon mielde šiehtadussii ásahussan ja oažžu 1,2 miljovnna ruvnnu jahkái dán njeallje jagi áigodagas. Sámedikki mielas lea danne lunddolaš veahá unnidit njuolggodoarjaga Beaivváš Sámi Našunálateáhterii»
Heajos signála
Sámediggeráđđi evttoha bušeahtas unnidit teáhterii 56 000 ruvnnuin doarjaga, dahje 0,3 proseantta. Sámi Našunálateáhtera stivrajođiheaddji, Lene Hansen, lohká iežas issorasat beahtahallan dál gal.
– Die gal ii lean buorre gullat ii veahášge. Dat gal lea duođai heajos signála, jus mii leat čeahpit leamaš gávdnat eará sajiin maid
ruđa, nu galgat beassat vel eambbo teáhtera fállat álbmogii, ja de unnidit Sámedikkis doarjaga, lohká Hansen.
– Ráŋggáštuvvot go leat čeahpit
Hansen lohká ahte ii oro gal nu stuora unnideapmi ruvnnuiguin ii ge proseanttain, muhto galgá muitit ahte sidjiide ii dušše unniduvvo doarjja, muhto sii eai oaččo eai haddegoargŋuma ge.
– Mii manahit dál oasi dan 1,2 miljovnnas gokčat haddegoargŋuma, ja eat beasa ollislaččat bargat dan maid leimmet jurddašan. Mii njuolggut ráŋggáštuvvot go leat čeahpit leamaš ja ožžon eambbo ruhtagálduid doarjut Sámi teáhtera, šuohkiha Hansen.
Manahit miljonbeali
Ávvir lea rehkenastán man olu teáhter sáhttá manahit, jus ovdalii go unniduvvo doarjja 0,3 proseanttain, de livččii ožžon 2,1 proseantta lasáhusa nu go máŋggas earát njuolggodoarjjalisttus. Jus livččii 2,1 proseantta lassáneami ožžon, de ledje oažžut 500 339 ruvnno eambbo go maid dál lea Sámediggeráđđi evttohan.
Ávvir lea geahččalan oažžut oktavuođa olles Sámediggeráđiin, muhto ii guhtege lean oažžumis ságaide.