– Dego politihkalaš fáŋga
Kárášjoga gielddastivra lea maŋŋonan koartilraporttain mii čájeha gieldda ruhtadili. Guovddášbellodaga áirras Anne Toril Eriksen Balto lohká go eai dieđe mo gieldda ruhtadilli lea, de eai sáhte maidege bargat.
Duorastaga čoahkkinasttii Kárášjoga gielddastivra. Áššelisttus guhtta ášši dohkkehuvvojedje. Muhto Guovddášbellodaga gielddastivrra áirras Anne Toril Eriksen Balto háliidit diehtit manin goalmmát koartilraporta dahje njealjádasraporta ii lean mielde dán áššelisttus, go dat lea measta beannot mánuin maŋŋonan.
– Go koartilraporta maŋiduvvo, de eat beasa, mii politihkkárat, diehtit mo dat ekonomalaš dilli lea gielddas, makkár hástalusat leat iešguđet ossodagain. Nu ahte eat sáhte dahkat maidege politihkalaččat. Mii leat politihkalaččat fáŋgan, go eat beasa maidege diehtit, eat ge beasa bidjat doaimmaid dan ektui, lohká Anne Toril Eriksen Balto.
Ossodagat eai leat vástidan
Kárášjoga ráđđealmmái Kurt Maurstad vástida dasa ahte goalmmát koartilraportta eai leat sáhtán bidjat áššelisttuid go buot ossodagat eai leat vástidan čakčamánu 15. beaivái.
– Lea hui šállošahtti go in beasa gielddastivrii muitalit mo ruhtadilli lea, čilge Kárášjoga ráđđe- almmái Kurt Maurstad gielddastivrii ja muitala boahtte jagi bušeahtta biddjo gieldastivrra ovdii skábmamánu loahpas.
Dego politihkalaš fáŋggat
Guovddášbellodaga gielddastivrra áirras Anne Toril Eriksen Balto čilge ahte goalmmát njealjádas oassi jagis lea juo historjá. Lohká nuppi koartilraporta maid lei maŋŋonan ja das ledje olu ekonomalaš hástalusat.
– Mii geat háliidat buori ekonomiijastivrejumi ja maiddái diehtit gieldda stáhtusa, mii váillahat goalmmát koartilraportta ja maiddái eambbo politihkalaš áššiid áššelisttus, lohká Anne Toril Eriksen Balto.
Dálá ráđđehus lea dieđihan boahtte jagi geahpeduvvo doarjja gielddaide 7-8 miljovnna kruvnnuin.
– Diet gullá boahtte jagi bušehttii ja buktá liige hástalusaid gildii, nu mo ruhtadilli lea dál gielddas. Mii leat Guovddášbellodagas váruhan ahte ruhtageavaheapmi ii sáhte mannat endorii vaikko leat ROBEKAS beassan eret. Dat ferte ain doallat suittehiid čavgadit, čilge Eriksen Balto.
Bivdán veahkki fylkkamánnis
Koartilraporta lea okta daid áššiin mii lea maŋŋonan, mii ii doaimmahuvvo rivttes áigái. Kárášjoga gieldda sátnejođiheaddji Svein Atle Somby muitala sii leat bivdán Finnmárkku fylkkamánni veahkkin njulget dáid áššiid.
– Mis leat olu váilevašvuođat min gielddas. Mii leat fylkamánniin čoahkkinastán mannan giđa ja gulaimet iešguđet bearráigehččui birra. Mu mielas lea sihke riek- ta ja dárbbašlaš ahte bohtet deike gieldastivrii muitalit daid váilevašvuođa birra, go gielddastivra lea bajimus orgána mis Kárášjogas, lohká sátnejođiheaddji Svein Atle Somby.
Fylkamánni oktan iešguđet bearráigeahčuiguin muitaledje maid ferte Kárášjoga gielda njulget ovddemuš, amas ii šatta dušše bággosáhkuid máksit go maŋŋona.
– Šaddat smávva dárbbašmeahttun goluid máksit, ruđaid maid livčče sáhtán geavahit eará sadjái. Gielddas leat olu hástalusat máŋgga suorggis. Danin lean bivdán fylkkamánnis veahkki, čilge Kárášjoga gieldda sátnejođiheaddji Svein Atle Somby.