Čieža beaivvis geasuhii eanemus gehččiid
– Dat lea mielahisvuohta, lohká kinohoavda Frank Bakkemo, gean mielas orui jo jáhkkemeahttun go oinnii man ollugat leat geahččan «Den 12.mann» filmma Romssas.
Dušše ovtta vahkkus šattai filbma dat eanemus gehččon filbman 2017:s Aurora Fokus Kinos Romssas, ja dasa lassin šattai juovlamánnu buot buoremus kinománnu goassege, čállá itromsø.
Eanemusat geasuhan gehččiid
Juovlamánu 25. beaivvi lei vuosttaščájálmas filmmas Jan Baalsrud birra, ja filbma lei hirbmat geasuheaddji. Olbmot diŋgojedje bileahtaid ovdal go filbma čájehuvvui.
– Jurddaš go filbma «Den 12.mann» nagodii šaddat eanemus gehččon filbman dušše čieža beaivvis. Gaskamearálaččat leat gaskal 1800 ja 1900 olbmo oaidnán filmma juohke beaivvi Romssas, muitala kinohoavda itromsii.
Gehččiidlohku ain lassána
Miehtá riikka ledje 233 080 olbmo oaidnán filmma, ođđajagemánu 1. beaivvi logu mielde. Dušše Oslos leat eambbo olbmot oaidnán filmma go Romssas.
Filbma čájehuvvo ain kinoin, ja ollislaš gehččiidlohku lassána ain beaivvis beaivái miehta riikka. Golmma vuosttaš beaivvi ođđajagemánus lei ollislašlohku lassánan 266 955 olbmui geat leat geahččan filmma kinos.
Guovdageainnus njealje geardde
Diehtosiiddas lea kinofilbma čájehuvvon njealje geardde, ja leat ollu geahččit oaidnán filmma. Oktiibuot leat 637 geahčči oaidnán filmma Guovdageainnus.