Áiggošii beassat máilmmi logi buoremusa searvái
14-jahkásaš Irja Sofie Nyheim lea njeallje jagi gilvvohallan juniorhandling beanagilvvuin. Son birgehallá bures ja hárjehallá viššalit vai šattašii máilmmi logi buoremusa searvái.
Romssa gávpoga parkerentuneallas hárjehallet Irja Sofie Nyheim (14) ja eará juniorhandlerat iežaset beatnagiid. Sii servet gilvvuide gos ulbmilin lea čájehit man buorre oktavuohta sis lea beatnagiidda. Irja Sofie eaiggáduššá 4-jahkásaš «Aicha» mii lea Cavalier King Charles Spaniel beananálli.
– Mus leamaš «Aicha» dan rájes go šattai, ja dat lea mu buoremus olmmái. Dat lea mu mielde go lean eatni luhtte ja go manan áhči lusa, «Aicha» lea mu mielde álo, dadjá nuorra beanaeaiggát.
Buorre gulahallan
Juniorhandling valáštallansuorggis gilvvohallet gaskal 10- ja 17-jahkásaš mánát ja nuorat. Gilvvuin ii geahča duopmár beatnaga, muhto olbmo. Gilvvohallis ferte buorre gulahallan beatnagi- in go galgá dan čájehit duopmáriidda, ja dasa lassin ferte sis buorre máhttu beananáli birra. Duopmár oainnat gažada oasseváldiid.
– Mun hárjehallagohten «Aicha» vielppisin jo. Álggos oahpai jeagadit go geavahin dan nama, ja de oahpai čuožžut nu go galgá gilvvuin. Dát lea veahkehan munno hui olu gilvvuin, čilge Irja Sofie Nyheim.
Riikajoavkkus
Irja Sofie lea gilvvohallan dan rájes go lei 10-jahkásaš. Son lea vuoitán olu gilvvuid sihke «Aichan» ja eará beatnagiiguin. Diibmá beasai maiddái riikajovkui, ja dalle vuite bronssa davviriikkalaš gilvvuin. Jáhkkimis ovddasta Irja Sofie Norgga maiddái dán jagi.
– Norggas gulan sin searvái geat vuitet eanemusat, guokte maŋimuš jagi lean vuoitán nubbin eanemus, muitala son.
Ii álo lihkostuva
Vaikke Irja Sofie lea vuoitán olu gilvvuid, de diehttelasat ii lihkostuva álohii. Son muitala muhtin gilvvu birra gos beana, mainna gilvvohalai, ii šat jeagadan su.
– Dán beaivvi lei hui arvi, ja dasa ii liikon beana. Dat beare goarjádii rieggás go galgen dan čájáhallat. Dadjen duopmárii ahte beana ii liiko čáhcái, ja dan gal logai ipmirdan. Dasa lassin cielai vel beana go oinnii iežas eaiggáda, dan gilvvus gal in beassan viidáset, čilge son.
Amas beatnagat
Juniorhandlerat eai gilvvohala dušše iežaset beatnagiiguin, muhto maiddái luoikkas beatnagiin. Irja Sofie searvá gilvvuide maiddái eadnebealis ja eará olbmuid beatnagiiguin.
– Mun láven sihke olbmáin ja earáin jearrat luoikkas beatnagiid vai beasan hárjehallat ja gilvvohallat daiguin. Dalle beasan čájehit ahte máhtán bargan ja vuoitit juohkelágan beatnagiiguin, dadjá Irja
Sofie Nyheim.
Buorre biras
Irja Sofie ii lean juniorhandler gilvvuid birra gullan ovdal go su áhčči gávnnai moarsi geas lea erenomáš stuora beroštupmi beatnagiidda. Lill-hedvik Greaker leamaš ieš juniorhandler, ja lea dál Irja Sofie ja eará nuoraid hárjeheaddji.
– Lill bargá hui olu beatnagiiguin, ja son dat lea čájehan ja muitalan munnje juniorhandlergilvvu. Moai finaime hárjehallamis ja kurssas. Dát lei mu mielas hui somá. Mis lea hui buorre juniorhandlerbiras ja leat olu fárrolágaid. Mii šaddat buorit olbmát ja buohkat liikojit beatnagiidda, dadjá Irja Sofie.
Dehálaš ieš hárjehallat
Lill-hedvik Greaker hárjehallá mánáid ja nuoraid, muhto son gilvvohallá ieš maid beanagilvvuin. Son dadjá ahte lea dehálaš ieš hárjehallat beatnagiin jus galgá lihkostuvvat.
– Buot deháleamos lea ahte handler oahppá áddet beatnaga, ja dan dahká buoremusat tuvrras, ruovttus ja go dikšu beatnaga. Mii leat olu luonddus go doppe oažžu olu buoret oktavuođa beatnagii go dás gos vázzit rieggás. Jus mánát ja nuorat galget lihkostuvvat lea maid hui dehálaš ahte ieža hárjehallet beatnagiid, eai olat seamma bohtosiid jus dušše geavahit beatnagiid maid earát leat hárjehallan, čilge Lill-hedvik Greaker.
Sáhttá olahit guhkás
Romssas leat olu čeahpes juniorhandlerat, ja Lill-hedvik Greaker dadjá iežas nieidabeali sáhttit olahit guhkás.
– Mun dáiddán veaháš bealálaš, muhto mu mielas lea Irja hirbmat čeahppi ja son lea lihkostuvvan bures dássážii. Son čájeha vuollegašvuođa, son lea čeahppi beatnagiiguin ja váldá ovddasvástádusa. Dasa lassin lea sus stuora beroštupmi dása, ja dat dáidá buot deháleamos. Irja hárjehallá ja geavaha olu áiggi iežas beatnagiid ja danin lea sudnos hui buorre oktavuohta. Son studere maid olu teknihkaid vai čoavddášii hástalusaid juniorhandlingas. Irja sáhttá šaddat Norggameašttirin, muhto maiddái máilmmimeašttirin jus lea dáhttu, lohká son.
Ulbmilat
Irja Sofie Nyheim searvá skábmamánus goalmmát gearddi Norgga meašttirgilvvuide, ja sus lea dieđusge miella lihkostuvvat.
– Mun háliidivččen vuoitit NM vai beasašin Crufts máilmmimeašttirgilvvuide. Dat lea máilmmi stuorámus beanačájáhus ja dohko besset buot riikkaid čeahpimus juniorhandlerat. Doppe livččii mihttu beassat logi buoremusa searvái. Mu buorre olmmái ja geainna jođán olu, Julia Sofie Sørum Bjørklund, lea golbmii beassan daid gilvvuide. Dál vuorddašan ahte son álgá gilvvohallat ollesolbmuid searvvis, vai mun ges beasan vuoitit. Son deavdá 18 jagi boahtte jagi, mojohallá Irja Sofie Nyheim.