Kárášjoga bárdni vuolgá Pakistánii čájehit vuoimmi
Kárášjoga bárdni vuolgá Pakistánii čájehit vuoimmi. Deaivvaš maid deaivá doppe, ii mihkke baldde su. – In leat veahá ge balus, illudan, dadjá Nils-henrik Tjikkom.
Birrasii vahkku áigi oaččui 30-jahkásaš dakkár fálaldaga man lei váttis guođđit. Norgga Thaiboksensearvi (NTF) áigu ahte kárášjohkalaš Nils-henrik Tjikkom galgá ovddastit Norgga Pakistánas thaiboksemis.
Earenoamáš dovdu
Tjikkom ii loga iežas ovdal leamaš Pakistánas, iige olggobealde Eurohpá, nu ahte lohká oktii ferte leat vuosttaš geardi.
Iige leat boastut ahte lea dákkár oktavuođas dat vuosttaš geardi.
– Lei hui earenoamaš dovdu oažžut dán fálaldaga, ii ge lean váttis vástidit ge dasa. Dát lea dakkár vejolašvuohta man dušše oktii eallimis oažžu, nu ahte lei bággu vástidit juo dasa, boagusta son.
Alla dássi vuordimis
Norgga Thaiboksensearvvis lea ovttasbargu Pakistan muay thai federationiin, ja AFSO lágida riikagilvvuid Punjabas vuosttaš geardde.
Norgga gilvvut leat njukčamánu 22. beaivvi dán jagi, muhto Norgga ovddasteaddji Nils-henrik Tjikkom ii leat veahá ge balus:
– Dássi gal lea dieđus allat dákkár stuora gilvvuin. Muhto in jáhke deaivvadit dakkáriiguin geaiguin ovdal in leat deaivvadan, in ge dakkáriid ge geaiguin boahtteáiggis in deaivvat, nu ahte in leat balus dási ektui. Lean áibbas sihkar ahte sis lea maid rádji galle geardde girdet časkot oaivái, dadjá son ja mieđiha ahte vuordámušat leat alladat ja doaivu deaivvadit garra vuostálastiiguin.
Olu hárjehallan ovdal go sáhttá vuolgit
Nils-henrik Tjikkom beroštišgođii juste dán valáštallamis gávcci jagi áigi, go cápmahalai ovtta olbmái.
– Vulgen ovtta olbmá mielde Mma-hárjehallamii geahččalan dihte. Vaikko mun ledjen olu gievrrat go son, de mun cápmahallen, hui álkit. Dalle fuomášin ahte dá lea juoga man áiggun hárjehallagoahtit, go orui somá, dadjá son.
Dan dihte son dál, gávcci jagi maŋŋel, ain berošta dán valáštallamis.
Son orru ja hárjehallá Kárášjogas, ja mieđiha ahte ferte olu hárjehallat dál ovdal go vuolgá dohko.
– Jurdda ovddasguvlui lea ain hárjehallat fárrolaga Kárášjoga Mma-servviin, finadit riikajoavkodeaivvademiin ja hárjehallat boares olbmáiguin, dadjá Tjikkom vel loahpas iežas plánaid birra ovddasguvlui.