Heiveheame allergiijaáppa sámegillii
2018 rájes gávdno Snelandia mátkeplánaáppa maiddái sámegillii: Snelandia Mátki. Sámediggi ja fylkkagielda leat ruhtadan dan. Fylkkagielda háliida geavaheddjiin oaiviliid das mo ođđa áppa doaibmá.
Finnmárkku fylkkagielda almmuhii áppa «Snelandia Mátki» ođđajagis, ja dan sáhttet Android- ja Ios-vuogádaga geavaheaddjit geavahit. Mátkeplána-áppa «Snelandia Reise», man buohkat juo dovdet, lea juo doaibman moadde jagi, ja dat lea dál jorgaluvvon sámegillii, dieđiha Finnmárkku fylkkagielda.
Sámegiel báikenamat eai leat sajis
Sámegiel veršuvdna doaibmá seamma láhkai go dárogiel veršuvdna. Muhto dađi bahábut eai leat sámegiel báikenamat vel sajis – ja nu ferte ge ohcat dárogiel báikenamaid. Dat lea teknihkalaš hástalus, ja váttisvuohta lea Regtop-fiilavuogádat, ja mii eat leat vel dasa gávdnan čovdosa. Muhto bargu lea jođus, ja fylkkagielda doaivu gávdnat čovdosa áiggi mielde, mii dahká vejolažžan ohcat sámegiel báikenamaid maiddái, go sámegiel báikenamat leat dehálaččat sámegiela ja kultuvrra čalmmustahttimis.
Áibbas lunddolaš
Fylkkagielda háliida ovdánahttit ja heivehit digitála čovdosiid maiddái sámegillii, ja sámegiel áppa lea oassi dan doaimmas. Oassi barggus lea ruhtaduvvon guovttegielatruđaiguin maid ožžot Sámedikkis. Finnmárkku fylkkagieldda mihttomearri lea ahte buot min digitála čovdosat galget gávdnot sihke sáme- ja dárogillii.
– Mii leat hui ilus go leat vuosttamuččat geat beassat almmuhit mátkeplána- áppa sámegielagiid várás, erenoamážit go Finnmárku lea okta dain fylkkain gos dat galggašii áibbas lunddolaš, dadjá Kultuvrra, álbmotdearvvašvuođa ja johtolaga váldolávdegotti jođiheaddji Geir Ove Bakken Finnmárkku fylkkagielda preassadieđáhusas.