Dát joavkkut servet 2018 Sámi Cupii
Vahkku geahčen álget spábbačiekčandoalut Staares. FA Sámi presideanta Håkan Kuorak illuda go 11 joavkku leat gergosat dán jagáš sámecupii.
Sámecup lea olu gesiid čohkken sihke spábbačikčiid, spábbačiekčanberošteddjiid ja eará olbmuid ovtta ja seamma sadjái. Maŋŋel máŋga jagi bottu, leat dál fas gergosat lágidišgoahtit dan.
Boahtte vahkku čoahkkanit spábbačiekčit, spábbačiekčiberošteaddjit ja eará olbmot doaluide Staarii, ja sámecupii.
Presideantta mielas buorre álgu
FA Sámi presideanta Håkan Kuorak duođašta ahte leat dieđihuvvon 11 joavkku. Olu čikčiin lea guhkes mátki. Bohtet Kárášjogas, Divttasvuonas, Váhčiris, Snoasas, Árvvesjávrris, Staares ja vel lullelis. Njeallje nissonjoavkku ja čieža dievdojoavkku.
– Ipmirdan ahte lea guhkes mátki vuolgit gitta Staarii, mii lea ge sivvan manne in lean vuordán eambbo joavkkuid. Muhto dá lea hui buorre álgu, dadjá Kuorak.
Buorre áigodat spábbačiekčamii
Čiekčit ja searvvit leat guhkit áiggi sávvan ahte sámecupa čiekčamat galggaše sirdot geasis dálvái. Dál lea FA Sápmi guldalan olbmuid ja sirdán dan. Kuorakas lea buorre doaivva ahte lihkostuvvet dáinna.
– Mun jáhkán ahte dá lea juoga mainna ain joatkit. Dá lea buorre áigi lágidit čiekčamiid, ja sávan ahte lihkostuvvat, dadjá son. Kárášjoga Johttisámiid Searvi (KJSS) ja Divttasvuona dievdojoavku leat joavkkut maid Kuorak muitá searvan máŋga jagi, mat dál fas leat searvame.
Čiekčamat álget vahkku geahčen
Vuosttaš čiekčan lea bearjadaga, guovvamánu 9. beaivvi gaskal Gaske-nöörje ja Jijsen Sibrie nissonjoavkkuid, diibmu guovttis.