Ekspeartalávdegoddi evttoha eanet ovddasfástádusa fylkkagielddaide
Duorastaga ovdanbuvttii ekspeartalávdegoddi fylkkagielddaid ođđa doaimmaid raportta. Ekspeartalávdegoddi lea evttohan rievdadit doaimmaid ja sirdit doaimmaid maid iešguđetge stáhtalaš ásahusat jođihit. Olu doaimmaid, maid dát ásahusat doaimmahit, erenomážit fylkkamánni, galget fylkkagielddat váldit badjelassii. Dát leat doaimmat mat gusket ealáhusaide, innovašuvdnii ja dutkamii, gelbbolašvuhtii, integreremii, kultuvrii, johtolahkii, dálkkádahkii ja birrasii.
Lávdegoddi oaivvilda dan láhčit nana servodatovdáneami buot beliide riikkas.
– Stuorradiggi lea mearridan ođđa fylkkastruktuvrra. Ekspeartalávdegotti raporta addá dehálaš cealkámuša mo galgat bargat viidáset sirdit doaimmaid fylkkagielddaide, lohká gielda- ja ođasmahttinministtar Monica Maeland.
Hástaleaddji ja váttis
Ekspeartalávdegotti vuođđudii Gielda- ja ođasmahttindepartemeanta mannan geasi, maŋŋá go Stuoradiggi ávžžuhii dan dahkat go meannudedje ráđđehusa regiovdnareforbmaevttohusa.
– Dát bargu šaddá hástaleaddjin ja váttisin. Dát lea evttohus man mii fertet vuđolaččat meannudit ja guorahallat, dadjá gieldaja ođasmahttinministtar Monica Maeland.
Positiiva lávdegotti rievdadusaide
Finnmárkku fylkkasátnejođiheaddji Ragnhild Vassvik lohká leat stuorra doaibmarievdadusaid mat leat evttohuvvon. Son lea positiiva go sirdašuvvet eanet doaimmat regiovnnalaš politihkalaš dássái.
– Mun lean mielas dasa ahte Finnmárkku ođđa doaimmain ja bargosajiin lea dássitvuohta, maiddái go jurddaša ahte Fylkkamánne doaimmat ja ovddasvástádus geahpeduvvojit, lohká Vassvik.
Ekspeartalávdegoddi lea árvvoštallan ođđa doaimmaid fylkkagielddaide ja geigejedje sin raportta gielda- ja ođasmahttinministarii Monica Maelandii.
Son lea ilus go lávdegoddi lea signaliseren eanet ruhtadeami regiovnnalaš dássái, maiddái dan guovtti davimus fylkka davviguovlonannemis.
Doarjjui fápmojuohkima
Fylkkasátnejođiheaddji juohká stádaráđiid oainnu ahte fápmo- juohkin stádas regiovnnalaš dássái lea ávkkálaš.
– Mun doaivvun ahte dat ođđa regiovdna šaddá nie ahte mii sáhttit duođaid váldit atnui olles fylkka, lohká Vassvik ja joatká:
– Lea gelddolaš oažžut ođđa doaimmaid, nu go intrigerema ja gelbbolašvuođa. Seammás lea Finnmárkku fylkkagielda čujuhan ahte mii háliidat eanet resursahálddašeami, erenomážit guolástusas. Nu ahte lean beahtahallan go dat ii leat evttohuvvon lávdegottis, dadjá Fylkkasátnejođiheaddji Ragnhild Vassvik.
Ekspeartalávdegotti raporta lea dál gulaskuddamis ja gulaskuddanáigi lea guhtta vahku.