BEAKKÁLMASAT vuosttaldit oktasaš fylkka
Fylkkasátnejođiheaddji mielas lea buorre go olbmot áŋgiruššet, muhto lohká ahte dát vuosteháhku ii váikkut oktiičaskima. Muhto su mielas lea dehálaš signaliseret šiehtadallamiin ahte Finnmárkkus lea stuora vuosteháhku oktiičaskimii.
18 dovddus dáiddára ja valáštalli Finnmárkkus vuosttaldit fylkkaid ovttastahttima.
Sii oaivvildit ahte bággo-oktiičaskin čájeha diehtemeahttunvuođa Finnmárkku iešlágan kultuvrra, historjjá, álbmoga ja vuoigatvuođaid birra.
Sii dorjot ođđa organisašuvnna «For Finnmark», mii áigu bissehit oktiičaskima.
Sámi beakkálmasat eai hálit oktasaš fylkka
Earret eará Jon Rønningen, Kai Somby, Mari Boine, Martin Schanche, Nils Gaup, Nils Utsi, Synnøve Persen ja Aage Gaup leat vuolláičállán cealkámuša.
– Bággo-oktiičaskin Romssain lea dárbbašmeahttun geahččalanprošeakta mas lea stuora riska. Finnmárku guoddá dan stuorámus riskka, celket sii.
– Finnmárku ferte sierra ovttadat
Sii oaivvildit ovttasbargu Romssain sáhttá ja berre dáhpáhuvvat eará ládje go ahte Finnmárku ii leat šat sierra ovttadat.
– Finnmárkkus leat buorit eavttut ovdánahttit báikkálaš vuoigatvuođaid ja ealáhusaid, ja stivret fylkka rikkis resurssaid. Vai dan galgat sáhttit, de ferte Finnmárku sierra ovttadat, mas lea sierra politihkalaš orgána, sierra stádalaš
– Buorre, muhto maŋŋit
Finnmárkku fylkkasátnejođiheaddji Ragnhild Vassvika mielas lea hirbmat buorre go olbmot áŋgiruššet, muhto lohká ahte lea measta maŋŋit, go oktiičaskinproseassa lea juo álggahuvvon.
– Ipmirdan ahte dál easka orru duohtan šaddan dat oktiičaskin olbmuide, ja maid dat mearkkaša. Olbmot dál álget áŋgiruššat, go eai lean jáhkkán ahte duođas dáhpáhuvvá. In báljo jáhke ahte dát bissehuvvo, vaikke lea vuosteháhku, ii leat politihkalaš eanetlohku rievdadit dien mearrádusa, lohká Ragnhild Vassvik.
Boatkanan šiehtadallamat
Dat guokte fylkka leat šaddan botket šiehtadallamiid go eai boađe ovttaoaivilii, ja galget boahtte vahkku deaivvadit stáhtaráđiin gii galgá ráđđádallat Norgga guovtti davimus fylkka politihkalaš njunnošiiguin.
Šiehtadallamat botkejuvvojedje go fylkkat eai boađe ovttaoaivilii gos hálddahusat galget leat. Finnmárku háliida politihkalaš hálddahusa Finnmárkui, ja hálddahuslaš fas Romsii.
Romsa háliida goappaš hálddahusaid Romsii. Go Finnmárku ii dasa miehtan, de boatkanedje šiehtadallamat.
Vassvik lohká ahte lea maid danne manne Romsa háliida eanetlogu oktasaš lávdegottis, vai besset eanetloguin mearridit nu go háliidit.
Signaliseret vuostehágu šiehtadallamiin
Fylkkasátnejođiheaddji mielas lea buorre go olbmot áŋgiruššet, ja su mielas lea dehálaš signaliseret šiehtadallamiin ahte Finnmárkkus lea stuora vuosteháhku oktiičaskimii.
– Stáhtaráđđi sáhttá álggahit oktasaš lávdegotti mii galgá stivret oktiičaskinproseassa. Romsa háliida ahte sis galget dákkár lávdegottis eambbo áirasat, Finnmárku fas háliida liikká olu áirasiid goappaš fylkkain. Stáhtaráđđi soaitá dasto váldit vuhtii dan vuos- tehágu mii Finnmárkkus lea olles dán prosessii, go álggaha dakkár lávdegotti.