– Eat fuola nazisttaid iežamet gáhtaide
Johkamohkemárkaniid oktavuođas dagahedje nazisttat eallima gáhtain gosa eai lean bures boahtimat. Sámeleavggahasat ožžo sin guođđit báikki.
Johkamohki guovddážis čuožžilii veahá riedja lávvordaga guovvamánu 3. beaivvi, go nazisttat fáhkka bahkkegohte gáhtaide gosa eai lean bures boahtimat.
Riŋgestedje buot iežaset olbmáide
Johan Sandberg Mcguinne lei márkanastime vahkkoloahpas, ja deaivvai leat guovdu ja gasku Johkamohki go eallin šattai.
– Álggos, go olbmot fuomášišgohte nazisttaid, de eai vuos riejaskan. Baicce šiehtadus šattai nu ahte buohkat galget riŋget politiijaide, ja maiddái buot iežaset olbmáide ja sihtat sin boahtit báikai. Juoga fertii dahkkot. Juste go ledjen čohkkedan kafeai, de bohte muhtun nieiddat geain lei sámi leavga mielde ja čuorvugohte «Ingen nazister i våra gator». Nu ahte juo, ledjen oalle guovddážis go dáhpáhuvai, dadjá son.
Eai oaivvildan iežaset leat ovddas
Sandberg Mcguinne lohká ahte nazisttat rievtti mielde eai gula sin gáhtaide. Váttisvuohtan lohká ahte nazisttat dihtet iežaset vuoigatvuođaid oalle bures, nu ahte sáhttá leat váttis diehtit juste goas sii mannet badjel rája ja goas eai.
– Dat lei hui ahkit, čuozai njulgestaga moktii go sii ledje doppe.
Nazisttat čužžo Gasskas kafea luhtte, muhto oaivvildedje ieža ahte leat luotta alde.
– Sii ákkastalle gokko rádji manna, ja de gal ledje Gasskas bargit nu suhttan ahte eatnasat čirro. Sii han čužžo njulgestaga guovdu Gasskasa nu ahte olbmot bággejuvvojedje vázzit juogo sin meaddel dahje čađa, vaikko ieža gal meinejedje ahte eai leat ovddas, dadjá Sandberg Mcguinne ja mieđiha ahte miellaláhki ii leat beare buorre.
Eai lean gal ballán
Olbmot eai lean ballán, muhto njulgestaga suhttan.
– Olbmot eai lean ballán. Mii geahččaleimemt oažžut sin lihkkasit, go eat áigon sin dohko, muhto ákkastalle beare vuostá. Danne lei nu buorre go bohte sámi leavggain ja duođaš čurvo sin eret. Vuojehedje nazisttaid eret. Ii lean obanassiige ballu, baicce suhttu ja fuolastupmi, dadjá son.
– Dat han ii lean plánejuvvon, nu ahte leimmet veahá dego gažaldatmearkkat go iđistedje. Dainna olmmoš suhttá duođaš, dadjá Johan Sandberg Mcguinne.