Mojunjálmmiid vuostái válde SÁPMI ART stipeandda
Lina Maria Viitala, Laila Mari Bransfjell ja Johanna Minde leat vuosttažat geat ožžot dan ođđa stipeandda sámi dáiddariidda. – Mii dáhttut movttidahttit sámi dáiddariid joatkit iežaset dáidagiiguin, lohká Katarina Pirak Sikko, gii lea Team Lapland ruhtačoagginvuođđudusa ovddasteaddji.
Guhttása nieida Lina Maria Viitala oažžu 25 000,- SEK sturrosaš stipeandda. Team Lapland stipeandda válljenjoavku lea mearridan ahte Viitala oažžu stipeandda go son olaha oallugiid iežas govvidan- ja hábmengielain. Sus lea buorre vejolašvuohta ovdánit iežas dáidagiid ja olahit ain viidábut.
– Lean nu ilus go oaččun dán stipeandda! In oba jáhkkán ge ahte juste mun oaččun dan, muhto jurdilin lea goit veara geahččalit juobe ohcat . Oaččun stipeandda ja munnje dat lea stuora gudnin, lohká Viitala.
Viitala bargá eanaš govvanjuohtamiin, muhto stipeandda áigu atnit geahččaladdat ieš hábmet tekstiillaid ja goarrugoahtit mánáide biktasiid.
Duodji váimmu lagamusas
Plassje boazosáminieida Laila Mari Brandsfjell oažžu 15 000,- SEK sturrosaš stipeandda. Team Lapland stipeandda válljenjoavku lea mearridan ahte Brandsfjell oažžu stipeandda go son doalvu árbevirolaš duoji dobbeliidda. Son ráhkada šalddi gaskal árbevieru ja ođđaáigásaš viessogálvohábmema. Lea hui miellagiddevaš oaidnit movt su duddjon lea ovdánan ovdalaččas gitta dálážii.
– Oba somá! Lean nu movttet go mu duddjon adno árvvus. Stipeanddain áiggun oastit ávdnasiid iežan loahppabargui Design og Kunsthåndtverk skuvllas, mainna lean dál bargame Göteborgas. Barggan viessogálvohábmemiin, muhto árbevirolaš duodji boahtá álot leahkit mu váimmu lagamusas, lohká Brandsfjell.
Ealáskahttit máttuid duodjeárbevieruid
Johanna Minde oažžu 10 000,- SEK sturrosaš stipeandda. Team Lapland stipeandda válljenjoavku lea mearridan ahte Minde oažžu stipeandda go son
čájeha beroštumi klassihkalaš árbevirolaš duodjái. Sáhkkiivuođain váldá son ruovttoluotta iežas máttuid duodjeárbevieruid ja šaddá somá oaidnit man guvlui su duddjon ovdána.
– Hirbmat buorre dovdu go mu bargu gudnejahttojuvvo! Stipeanddain háliidan dutkat ja ealáskahttit duodjeárbevieruid mat ledje mu máttuin geat bohte Ofuohtas ja Roabas Lulli-romssas.
Váttis válljet
Team Lapland geige Sápmi Art stipeandda juohke jagi das maŋás. Team Lapland lea ruhtačoaggin vuođđudus maid Curt Emmoth lea álggahan. Emmoth ieš skeŋke ruđa vuođđudussii dan vuosttaš golbma jagi, muhto das viidásit ferte stivra gávdnat eará ruhtadeddjiid.
Katarina Pirak Sikko lea Team Lapland stivrra ovddasteaddji.
– Mis lea leamaš hirbmat váttis bargu válljet dušše golbmasii stipeandda, go mii oaččuimet oktiibuot 67 ohcama, lohká Sikko.
Eatnasat geat barget kultursuorggis várra vásihit man váttis lea háhkat sisaboađu, dan seammás go buvttadit maid galggalii. Sápmi Árt stipeanddain eat gáibit makkárge bohtosiid. Mii háliidit stipe- andaruđain galgá beassat alcces udnot juoidá maid muđuid ii livčče rásken, leaš dát golgat ohcat inspirašuvnna dahje mii nu de eará. Stipeanddain mis ii leat dušše ruđas sáhka, muhto maiddái movttiideapmi. Lea nu dehálaš čalmmustahttit sámi dáiddáriid ja gudnejahttit sin geat válljejit dáidagiin bargat. Dán jagi mii leat earenoamážit gudnejahttán duojáriid, go mii diehtit duojáriidda eai juolluduvvo bargostipeanddat seamma dávjá go eará dáiddasurggiide.