Šerres jienain álggahedje šovva
Guovdageainnu mánáidskuvla álggahii Sámi álbmotbeaivve ávvudeami Báktehárjjis iđđes - gos sii dolle skuvlakonseartta.
Mánáidskuvlla oahppit ledje ráhkkanan nannosit konsertii álbmotbeaivvi oktavuođas Báktehárjjis, ja buot klássat fitne lávddi alde. Buohkat ledje nu čábbát čiŋahuvvon ivdnás sámi čiŋaiguin, ja guoimmuhedje gehččiid sihke lávlagiin ja luđiin.
Olles skuvla čoagganan
Guovdageainnu mánáidskuvlla rektor, Turid Vesterheim, sávai álggos bures boahtima buohkaide. Oahppit, oahpaheaddjit, váhnemat, ovddasteaddjit, assisteanttat ja eará guossit ledje čoagganan Báktehárjái. Buot čohkkánsajit ledje dievvan, ja hálla lei spagga dievva. Maŋŋel go rektor gearggai hupmame, attii son sáni beaivvi láidesteddjiide. Magdalena Turi, Anna Ragnhild Bals, Ole Martin Skum ja Sunná Gáhte Gaup Myrnes ledje láidesteaddjit.
Álggahedje šovva
Skuvlla nuoramusat álggahedje šovva. Sii ledje hárjehallan Sámi álbmotbeaivvi lávlaga lávlut, ja šárbma ii váilon go de lávlestedje šerres jienain. Maŋŋel vuosttaš luohká ohppiid bohte okta nubbi lávddi ala. Oahppit guoimmuhedje sihke lávlagiin, luđiin ja eará guoimmuhemiin.
Illudan beaivái
Ingá Máren Näkkäläjärvi ja Sara Biret Marja Eira vázziba čihččet
luohkás. Sin luohkká lea maid ráhkkanan guoimmuhit gehččiid, ja leaba vuorddašeame dassái go lea sin vuorru guoimmuhit go Ávvir jearaha sudno. Soai lohkaba beaivvi dehálažžan.
– Dát beaivi lea dehálaš munnje. Mun láven Báktehárjái vuolgit, ja ruovttus láven TV:S geahččat oidno go nášunálabeaivvi birra
mihkke, muitala Sara Biret Marja Eira. Ingá Máren Näkkäläjärvi lea mielde koaras, ja lea guhká hárjehallan dán beaivái, go dalle galgá koara maid lávlut.
– Mun láven mannat báktehárjái, gos mun geahčan skuvlakonseartta. Ja láven maid koarain lávlut maŋŋelaš, dadjá fas Ingá Máren Näkkäläjärvi.
Olu hárjehallan ovdal beaivvi
Ovdal álbmotbeaivvi ja skuvlakonseartta lea skuvlaluohkáin leamaš olu hommá. Nieiddaš guovttos muitaleaba iežaset ráhkkanan ja hárjehallan olu ovdal dán beaivvi.
– Mii leat ovdal dán beaivvi hui olu hárjehallan skuvllas. Mii galgat lávlut «liekkas» lávlaga, muitala Ingá Máren.