Sámi álbmotbeaivvedoalut sturrot Álttás
Jagis jahkái ihtet dađis eanet sápmelaččat Sámi álbmotbeaivvi almmolašdoaluide. Álttá Sámi searvvi jođiheaddji ávvuda Sámi álbmotbeaivvi Álttás iluin ja movttain.
– Juohke jagi ballat ahte eai boađe nu ollu olbmot, muhto sii bohtet, lea nu somá oaidnit ollu gávttehasaid ja čiŋadanolbmuid, geat devdet visti ja oasálastet ávvudeames, dadjá Álttá Sámi searvvi jođiheaddji, Marit Inga Sara Pettersen.
Olmmoš vallji
Álttá almmolašdoalut Sámi álbmotbeaivvi ledje Bul-valáštallanvistis maŋŋebárggaeahkeda. Badjel 300 olbmo ledje boahtán ávvudit Sámi álbmotbeaivvi, hui olusat ledje čiŋadan gávttiiguin ja Sámi čiŋaiguin.
Sturrot
Guosselohku maid stuorru jagis jahkái, ja álbmotbeaivvedoalut leat sirdojuvvon mánáidgárddelanjas, Folketshusii gitta Bul-valáštallanvistái.
– Dát čájehuvvo ahte lea dárbu stuorát vistái, gos maiddái mánát besset buđaldit ja njoarostit, ja eai dárbbaš olgun buollašis stoahkat. Jus beassat de mii ávvudat dáppe boahtte jagi maid, dadjá Pettersen.
Nana bargu boktá beroštumi
Son oaivvilda dát stuorra beroštupmi maid sámeálbmot čájeha, boahtá barggus mii dahkko Álttás.
– Mis lea giellakurssat, mis leat duodjekurssat ja olu eará fálaldagat. Olbmot háliidit ruovttoluotta iežaset identitehta ja sámevuođa, dadjá Pettersen. Son lea logemat jagi orron Álttás ja vuohttá maiddái ahte sámevuohta lea eanet dohkkehuvvon maŋimuš áiggi.
– Dál eai šat nu reagere olbmot go gávtti leat nahkehan, muhto adnet dan dábálažžan, dadjá Pettersen.
Dorjot valáštallama
Pettersen lea duhtavaš ja ilolaš, muhto váiban maŋŋá doaluid. Son muitala lea olu bargu ráhkkanit doaluide gosa ná olu olbmot čoagganit.
– Mis leat 100 miellahttu, muhto eai olbmot astta eaktodáhtolaččat bargat.
Šaddá olu bargu moaddásiidda. Mearrideimmet de ahte mii bargat BULvaláštallan joavkkuin ovttas. Sii dolle kafea ja čorgejedje min maŋis. Nu ahte mii sáhttit dadjat ahte Sámi searvi lea mielde doarjumin valáštallama, hui buorre, muhto sávašin gal eambbo vehkiid dattetge, dadjá Pettersen.
Álttá sámegárddi mánát herskostalle biđđosiin ja dánsestedje sámemusihkkii Sámi álbmotbeaivvi. Govven: Alice Balto