Luondu ja Nuorat -searvi lea gearggus Alimusriektái
Vuossárgga almmuhuvvui ahte Greenpeace ovttas Luondu ja Nuorain guoddala dálkkádatlágasteami duomu, maŋŋá go Oslo diggegoddi ođđajagemánus áššehuhtii Norgga stáda. Luonddugáhttenorganisašuvnnaid mielas oljobohkan Árktalaš guovlluin rihkku vuođđolága birasparagráfa, dan dihte go oljonuoskkideapmi billista boahttevaš buolvvaid luonddu ja birrasa. Finnmárkku Luondu ja Nuorat dál leat gergosat dáistalit Alimusrievttis.
– Lágastemiin mii geahččalit bissehit eiseválddiid ja oljoindustriija plánaid, mat bohtet mielddisbuktit miljovnna tonna dálkkádatgássaluoitima. Mii oaivvildit ahte Norga lea riggon doarvái guhká billisteames dálkkádaga, ja mii leat dál gergosat joatkit bargguin Alimusrievttis, dadjá Anja Risten B. Eira, Guovdageainnu Luondu ja Nuoraid jođiheaddji.
Gierdat dálkkádatrievdamiid
Eanaš Luonddu ja Nuoraid miellahtuin ii leat jienastanvuoigatvuohta vel. Liikká sii leat geat fertejit gierdat dálkkádatrievdamiid čuovvumušaid. Eira oaivvilda ahte dát dálkkádatlágasteapmi lea erenomáš dehálaš nuoraide.
– Ain ohcat oljju máilmmi hearkkimus ekovuogádagain, lea njuolgut dego fallehit boahtteáiggi buolvvaid. Norgga eiseválddit orrot vuoruheamen min riikka sisaboađu, eambbo go fuolahit oruhahtti eatnanspáppa. Mii eat eaiggáduša máilmmi, mis lea dat dušše luoikkasin, joatká Eira.
Birasparagráfa geahččalit Alimusrievttis
Organisašuvdna lea dál dáhtun ahte ášši viidáset meannuduvvo Alimusrievttis. Jus dainna lihkostuvvet, de lea dat vuosttaš geardde go vuođđolága birasparagráfa geahččaluvvo Alimusrievttis. Anja Risten B. Eira oaivvilda ahte máilmmis ii leat áigi vuorddašit meannudeami Lágamánnerievttis, dálkkádatpolitihka nuppástus ferte boahtit dál.
– Mis ii leat áigi láikkošit, dálkkádatrievdamat fertejit bissehuvvot dál. Dan dihte mii sávvat ahte ášši dál gártá njuolgga alimusduopmára njune vuollái, loahpaha Anja Risten B. Eira.