Sámisoster beavttálmahttá doaimmaidis sámeguovllu olggobealde
Sámiid riikkaviidosaš sosiála, dearvvasvuođa- ja kultursuorggi searvi SámiSoster ro beavttálmahttá doaimmaidis sámeguovllu olggobealde. Figgamuššan lea vástidit dálá dili buorebut sámeguovllu olggobealde ássi sápmelaččaidgielalaš ja kultuvrralaš sihke sosiálalaš buresbirgejumi ja dearvvasvuođa ovddideapmái gullevaš dárbbuide. Searvi lea ožžon dán doaimma várás lassiruhtadeami sosiála- ja dearvvasvuođaservviid doarjjaguovddážis (STEA).
Doaimma ollašuhttima várás searvi lea vuođđudan ollesáigásaš sierraáššedovdi barggu. Dán bargui searvi lea nammadan hálddahusdiehtagiid magisttar Juha Guttorma 1.2.2018 rájes. Sierraáššedovdi bargun lea doaimma álgomuttus čilget čuozáhatjoavkku dárbbuid ja gárvet dan vuođul doaibmaplána. Dárbbuid čielggadeamis geavahuvvojit ávkin áššái guoski jo dahkkon čielggadusat ja dutkamušat. Go doaibma lea ovdánan fásta vuođu ala, sierraáššedovdi bargun lea ovddidit plána ollašuhttima, oktiiheivehit dasa čállon doaimmaid, dikšut doaimma diehtojuohkima, dieđu buvttadeami ja čanusjoavkodoaimma sihke hukset doaibmi- ja doarjjafierpmádagaid. Dasa lassin su bargun lea čuovvut doaimma ollašuvvama ja ovdáneami ja raporteret das. Fásta doaimma iskkadeami lea áigumuš álggahit Oulu guovllus.
Váldodeaddu searvvi doaimmain sámeguovllu olggobealde boahtá leat eanáš sápmelaččaid kultuvrralaš identiteahta, oktiigullevašvuođa dovddu, oasálašvuođa ja servvolašvuođa doarjumis. Lassin figgamuššan lea doarjut sápmelaččaid vejolašvuođaid oassálastit buorebut go ovdal iežas servodaga ja ieš ráđđema dikšumii ja ovddideapmái. Doaibma presiserejuvvo dárbbuid čielggadeami maŋŋá. Dán láhkai ovddidit sápmelaččaid gaskasaš ovttaveardásašvuođa sihke doarjut servoša čavddisvuođa ja eallinvuoimmi ja dien bokte dan buresbirgejumi ja dearvvasvuođa. Sámisoster searvi sávvá oktasašbargoguoibmin ainjuo sámeguovllu olggobealde doaibmi sámeservviid ja eará servviid sihke searvegottiid, gielddaid ja eará almmolaš servošiid, vai doaibma menestuvašii bures.