Lihkostuvvan Idja Clubain Oslos
Oslo sámi nuorat barget veahkkálaga doalahit iežaset sámi deaivvadan arena rabasin.
Sámi nuorat Oslos ásahedje iežaset Sámi «night club» Norgga oaivegávpogis, go lei váilevašvuohta kultuvrralaš doaluide sámi nuoraide 2016:s. Dál, badjel guokte jagi maŋŋel, lea dat ain deaivvadanbáiki sámi nuoraide.
Guhtta konseartta jahkái
Oslo sámi nuorat barget veahkkálaga doalahit Idja Cluba rabasin. Okta sis lea Oda Agnethe Svendsen, gii lea lagabui guokte jagi bargan dainna, ja loaktá barggus.
– Lea hui somá leat mielde hábmemin arena sámi nuoraide gos besset deaivvadit, olggobealde Oslo Sámi viesu, dadjá Svendsen. Son muitala iežaset dábálaččat doallat golbma konseartta čakčat, ja golbma konseartta giđđat.
Eai boađe dušše musihka guldalit
Svendsen ii jáhke nuoraid boahtit dušše musihka guladit, dat lea eambbo dego bonus.
– Jáhkán nuorat bohtet deike deaivvadit eará sámi nuoraiguin ja earáiguin geaid eai soaitte deaivat nu dávjá, sosiála ovttastallan. Idja Club lea maid dakkár báiki gos nuorat geat dušše leat finadeame gávpogis, guovlalit go leat Oslos.
– Leat measta álo muhtumat geat leat dušše finadeame Oslos, ja danne deaivá dávjá olbmuid geaiguin ii šatta servvoštallat juohke beaivve.
– Gáhttet giela seammás go suohtastallet
Mannan vahkkoloahpa guoimmuhii Elle Márjá Eira Idja Clubas. Dat lea artista gean oallugat eai lean oaidnán ja danne geasuhii nuoraid.
– Ledje boahtán birrasii 50 olbmo. Sii geat ovdal eai lean oaidnán ja gullan su, ledje hui positiiva ja orro liikome konsertii. Mii lávet muhtomin oažžut cavgilemiid geaid nuorat háliidivčče oaidnit ja gullat Idja Clubas, muhto eanaš ohcat dakkár artisttaid geat heivejit deike, dadjá Svendsen. Nu go son dadjá, de ii leat dušše musihkka guovddážis deaivvadanbáikkis. Giella lea maid fokusis.
– Mu mielas lea dakkár sámi arena hui dehálaš. Dat lea deaivvadanbáiki, muhto maiddái báiki gos beassá praktiseret giela ja deaivvadit iežasláganiiguin.
Stuora mearkkašupmi sámi musihkkii
Sámi komponistasearvvi jođiheaddji, Ann-mari Andersen lohká dákkár lávddis stuora mearkkašumi sámi musihkkii.
– Dát lávdi lea dehálaš čalmmustahttit sámi musihka ja movttiidahttit eambbo olbmuid, go dáppe beassá čájehit dan maid lea ráhkadan. Lea buorre go oaivegávpogis lea dákkár lávdi, muhto ii livčče dahkat maide jus eará gávpogin maid livčče, go Finnmárkkus eai ge leat galle sámi lávddi. Danne dárbbahit mii olu čeahpes olbmuid geat barget, dadjá son. Oslos lea stuora sámi biras gos olu sápmelaččat orrot, danne lea Andersena mielas buorre go doppe lea dát lávdi.
– Dat ii leat dušše čalmmustahttime ja ovddideame sámi musihka, muhto maiddái sámi giela ja kultuvrra, lávddis. Dat lea dehálaš.