– Midjiide lea vejolaš dieđihit jus oahpahus ii deavdde gáibádusaid
Fylkkamánni bealis eai loga ožžon makkárge dieđuid heajos sámegieloahpahusa birra Álttá joatkkaskuvllas, vaikko dát leage leamaš váttisvuohtan guhká.
Álttá joatkkaskuvllas lea sámegieloahpahus guhká leamaš váttisvuohtan, ja oahppit dovdet ahte sámegiella ii vuoruhuvvo seamma láhkai go eará fágat. Ávvir lea sihke 2017:s čállán dán ášši, ja maiddái gieskat leat čállán dan birra.
– Joatkkaskuvllain lea dávjá fylkkamánni mii galgá bearráigeahččat ahte oahppit ožžot dan oahpahusa masa sis lea riekti. Lea oahpis sámi servodagas ahte váidalanásahusat dávjá eai geavahuvvo, ja olu servodatsurggiin maid oaidnit ahte dát reaidu váldo unnán atnui. Dat vejolašvuohta berrešii adnojuvvot vai mii oažžut buoret gova das mo dilli lea ja mii berrešii buoriduvvot, dajai Sámedikki ráđđelahttu, Mikkel Eskil Mikkelsen, Ávvirii mannan vahkus.
– Eat leat ožžon dieđuid
Norggas leat instánssat mat galget bearráigeahččat ahte oahppit ožžot dan oahpahusa masa sis lea riekti. Joatkkaskuvllaid váste lea fylkkamánni dat instánsa gosa sihke oahppit, skuvllat dahje fylkkasuohkan sáhttet cavgilit jus oahpahus ii oro doarvái buorre.
Finnmárkku fylkkamánni oahpahusdirektevra, Ole Håkon Haraldsen, ii loga iežas gullan ovttage ášši ahte joatkkaskuvlla oahppit eai leat duđavaččat dainna oahpahusain maid ožžot sámegielas.
– In dovdda ovttage ášši das ahte joatkkaskuvlaoahppit Finnmárkkus eai leat duđavaččat dainna sámegieloahpahusain maid ožžot. Midjiide lea vejolaš dieđihit dákkáriid birra, ja mii fertet diehtit dákkár áššiid birra jus galgat sáhttit bargat maide dainna, lohká son.
– Jáhkán dárbbu eambbo instánsaide
Sámedikki nuoraidpolitihkalaš lávdegotti (SÁNUL) jođiheaddji Ole-henrik Bjørkmo Lifjell mielas lea vuorjašuhtti go sámegiella ii vuoruhuvvo.
– Mu mielas lea vuorjašuhtti ahte sámegiella ii vuoruhuvvo. Dá lea dađi bahabut juoga man šaddat vásihit beare dávjá. Earenoamáš váttis orru go sámegiella badjelgehččojuvvo skuvlla čađa. Sámegieloahpahus lea riekti mii ohppiin lea lágalaččat, ja dasa lassiin lea sámegiella almmolaš giella Norggas. Danne lea balddihahtti oaidnit ahte skuvllat beasahit iežaset eret dan ovddasvástádusas. Jearan alddán makkár guottuid sii dalle leat mielde gilvime nuoraid vuostá, geat juo leat hearkkes dilis.
Dárbu eambbo bearráigehččiide
Ole-henrik Bjørkmo Lifjell jáhkká ahte lea dárbu eambbo instánssaide mat galget bearráigeahččat ahte sámegieloahppit ožžot dan oahpahusa sámegielas masa sis lea vuoigatvuohta.
– Ii dušše danne go leat oallugat geat badjelgehččet, muhto maiddái go leat olu oahppit geat ožžot sámegieloahpahusa gáiddusoahpahusa bokte, ja teknihkalaš ávdnasat eai álo doaimma nu go galggaše, lohká Bjørkmo Lifjell Ávvirii.
Fylkkasuohkana ovddasvástádus
Finnmárkku fylkkamánni oahpahusdirektevra čilge ahte lea joatkkaskuvllaid eaiggáda, fylkkasuohkana, ovddasvástádus gozihit ahte oahppit skuvllain ožžot dan sámegieloahpahusa masa sis lea vuoigatvuohta.
– Fylkkasuohkanis lea ovddasvástádus gozihit ahte buot sámegieloahppit joatkkaskuvllas ožžot dan oahpahusa masa sis lea vuoigatvuohta. Mis fylkkamánni bealis lea oktavuohta fylkkasuohkaniin, ja sii dieđihit midjiide jus dakkár áššit čuožžilit, lohká son.
Ávvir ii lihkostuvvan oažžut Finnmárkku fylkkasuohkana oahpahushoavdda Margunn Blix ságaide ovdal aviissa deaddilanáiggi.