Rahčet olahit mánáid ja nuoraid
Oslo Sámiid viesus finadit olu guossit, muhto stivrajođiheaddji ii aŋkke dovdda ahte nagodit olahit buohkaide geaidda áiggošii.
Oslo Sámiid viesus galget leat fálaldagat buohkaide, ja galgá leat deaivvadanbáiki buohkaide. Dán rádjái eai dovdda ahte olahit dan, go rahčet oažžut mánáid ja nuoraid deaivvademiide.
Alla guosselogut
Oslo Sámiid viessu lea deaivvadanbáiki sápmelaččaide gos galget beassat sámástit, borrat sámi borramuša ja guldalit sámi musihka beroškeahttá man boaris dahje nuorra olmmoš lea.
– Jus geahččat guosseloguid, de čájehuvvo ahte viesus lea alla árvu, go leat olu olbmot geat geavahit viesu. Mis leat earret eará boarrásat geat deaivvadit oktii mánus ja leat lagabui golbmalogis. Dat lea hui buorre, muitala Oslo Sámiid viesu stivrajođiheaddji, Per Olav Nymo. Son muitalá ahte sis leat doalut mánggageardde jahkái, earret eará duodjekurssat, giellakurssat, giellakafeat, fáddáeahkedat ja eambbo.
Eai olat mánáid ja nuoraid
Vaikko leat alla guosselogut, de eai olat buohkaid geaid háliidivčče.
– Mis galggašii leat fálaldagat buohkaide. Dat mainna dán rádjái eai leat vel lihkostuvvan, leat mánát. Mii leat geahččalan ovttasbargat mánáidgárddiiguin, muhto dat lea váttis, dadjá Nymo.
Guovtti vahkku áigi lei sámiid viesus mánáidteáhter, dovddus lullisámegiel mánáidteáhter dárogillii. Dainna eai ge lihkostuvvan.
– Geahččaleimmet dalle almmuhit dan miehtá, vel mánáidgárddiin ge. Lei lávvordaga ovdalgaskabeaivvi, nu ahte jurddašeimmet ahte mánáidgárdemánáid váhnemat vuoruhit boahtit, muhto ii leat nu álki go leat eará fálaldagat ja olbmuin leat eará hommát. Lea váttis oažžut olbmuid kulturlágidemiide vaikko lea earenoamážit heivehuvvon sámegielat mánáide. – Mo áigubehtet čoavdit dan váttisvuođa?
– Fertet geahččalit buoridit gulahallama mánáidgárddiiguin ja váhnemiiguin, gulaskuddat makkár sávaldagat sis leat ja das joatkit bargguin. Geahččalit hábmet joavkku mas leat olbmot geat loktet sámiid viesus ja háliidit mánáideaset dohko.
Vuoras olbmot ja turisttat
19-jahkásaš Ronja Vara, gii lea barggus álo go lea rabas, lohká árgabeivviid viesus oalle jaskadin, muhto sáhttet šávihit olbmot go fal lágidit maide.
– Leat eanaš vuoras olbmot ja turisttat geat fitnet dáppe, unnán nuorat. Muhto jus lágidit maide, nu go sisteveaskogoarrunkurssa, de gal šávihit olbmot, dadjá son.
Son lea bargan sullii mánu Oslo Sámi viesus go Ávvir fitná su ságain ja son loaktá barggus. Son muitala alddis bearraša davvin, mii dagahii ahte háliidii dakkár barggu.
– Dát lea dehálaš viessu Oslo sámiide dáru gávpogis, mii lea nu guhkkin eret Sámis. Dasa lassin lea munnje dehálaš váldit oasi iežan kultuvrras go mus leat fuolkkit davvin.
Einnosta čuvges boahtteáiggi Oslo Sámiid vissui
Vaikko Nymo mieđiha veahá hástalusaid, de einnosta čuvges boahtteáiggi Oslo Sámiid vissui, go manná dan dihte oalle bures singuin.
– Jus geahččat responssa ja ruovttoluottadieđuid maid leat ožžon sis geat ruhtadit min, de orru čuvges boahtteáigi. Čuovgat dan dihte go mis leat olu guossit, leat beaggán olu medias, leamaš guossit nu go sátnejođiheaddjit, presideanta ja ministarat máŋgii. Sii geat ruhtadit min fertejit leat oalle duhtavaččat, dadjá Nymo.