Bissehedje huksenbarggu ovttatmano
FINNMÁRKU: Finnmárkku politiijat, Bargobearráigeahčču ja Hámmárfeasta suohkan dárkkistedje mannan vahkus muhtin huksenbáikki Hámmárfeasttas, gos okta fitnodat lei ođasmahttigoahtán muhtin priváhta viesu. Eternihttapláhtaid saneren - maid dát bargu mielddisbuvttii, lea asbeastaguoddi ja gáibida sierragelbbolašvuođa.
– Dákkár saneremii ferte sierragelbbolašvuohta ja dohkkeheapmi. Suohkan oaččui cavgileami das ahte dát bargu lei álggahuvvon ja bargit eai atnán suodjalanávdnasiid - dušše cuvkeje eternihttapláhtaid eret seinniiguin, lohká Finnmárkku Politiijaguovddáža ealáhusoktavuohta Olaf M. Andeassen.
Dárkkisteamis čájehuvvui ahte leat dahkkon olu njuolggadusrihkkumat ja bargu bisse- huvvui ovttatmano. Dasa lassin ii lean dohkkehuvvon plána das ahte mo áigu vurket dán asbeasta guoddevaš ávdnasa.
– Bargu bargojuvvui dainna lágiin ahte lei váralaš bargiid dearvvašvuhtii ja ránnjáide lagasbirrasis. Dat lea duođalaš, lohká Andreassen.
Fitnodat váidojuvvo politiijade ja Bargobearráigeahčču čuovvu sanerenproseassa viidáseappot.