Gazzet divrras oahpu
Duodjeoahppit Oslo Sámi viesus gazzet divrras oahpu go lágiduvvo sisteveaskogoarrunkursa.
Mannan vahkkoloahpa álggii sisteveaskogoarrunkursa Oslo sámi viesus mii dán vahkkoloahpa joatká. Čájehuvvo ahte kurssat sámi viesus leat bivnnuhat, go kursalatnja lei spagga dievva.
Vuosttaš geardi
Kursaoassálastit leat sisteveaskkuid goarrumin go Ávvir finada ságain. Eatnasat lanjas leat vuosttaš geardde goarrumin sisteveasku.
– Lean oalle olu gorron ovdal, muhto in leat goasse gorron sisteveaskku, dadjá Charlotte Frivik. – Lea hui somá, muhto gieđat gal leat oalle bákčasat, muđui gal lea somá, boagusta Renate Sørgård.
Álki go vuos oahppa
Duodjeoahppit galget goarrut sis- teveaskku man ieža vel hervejit. Kursadoalli lea Ann Kristine Balto.
– Ferte álggos oahppat vuođđobarggu, lean ruovttus geahččaladdan, muhto in máhte vel áibbas. Go dál dáppe lea kursadoalli veahá nevvon ja veahkehan, de dat veahkehii olu, dadjá Frivik.
Livčče dárbbahuvvon vel eambbo
Renate Sørgård ja Charlotte Frivik leaba ovttaoaivilis ahte Oslo Sámi viessu lea hui buorre deaivvadanbáiki ja livčče áinnas galgan vel eambbo dákkár viesut riikkas. – Livčče galgat eambbo dakkárat, earenoamážit midjiide geat orrut dáppe lulde. Dáppe lea váttis gávdnat oahpaheddjiid, earenoamážit munnje geas leat golbma máná in ge sáhte dušše vuolgit davás kursii. Váillahan dakkár báikki gos deaivvada earáiguin geat máhttet duddjot geain sáhttá oahppat ja digaštallat iešguđet áššiid. Huma- dit bargovásáhusaid ja sohkkahistorjjá birra, dat lea divrras áigi, dadjá Frivik.