Ipmila soajáid vuolde
«Soaját» daddjo oalle máŋgii Biibbalis. Dat govvidit sihke fámu, muhto govvidit maid ovddasmorraša ja suodjalusa. Profehta Jesaja celkkii álbmogii guhte gillái: «muhto dat geat vurdet Hearrá, ožžot ođđa návccaid, sii bajidit soajáid dego goaskimat» (40, 31). Jesus anii eará lotti ovdamearkan go bákčasis čurvii: «Man dávjá mun livččen dáhtton čohkket du mánáid, dego vuonccis čohkke čivggaidis soajáidis vuollái. Muhto ehpet dii dáhtton» (Matt 23, 37). Dat goargadis goaskin – dat eahcálaš vuonccis. Goappaš lottit muitaleaba juoidá Ipmila ovddasmorrašis. Buot heakkalaččat dihtet iešalddiset dorvvastit dan lusa guhte addá ovddasmorraša dahje gean doaivu addit suodjalusa ja gii dáhttu suodjalit váralaš dilis. Nu lea maid olmmoš. Dan dihtii David rohkadallá: «Várjal mu dego iežat čalbmegáhká, čiega mu soajáidat suoivvanii» (Sálbma 17,8). Doppe son lei dorvvolaš, dan son diđii. (KPK)